Аказанне матэрыяльнай дапамогі — чарговы крок па падтрымцы ветэранаў Вялікай Айчыннай вайны. Да 70-годдзя вызвалення Беларусі ад нямецка-фашысцкіх захопнікаў аднаразовую матэрыяльную дапамогу на суму каля 1,3 млрд. рублёў атрымалі ў раёне 270 ветэранаў, членаў сем’яў ваеннаслужачых, партызан і падпольшчыкаў, загінуўшых у час вайны, інваліды з дзяцінства ў выніку раненняў, звязаных з баявымі дзеяннямі, іх наступствамі, былым вязням.

У паляўнічай сядзібе «Сезон палявання», размешчанай на маляўнічым беразе Свіслачы, штомесяц спыняецца каля 30 аматараў аграэкатурызму — як жыхароў Асіповіччыны, так і гасцей са сталіцы і Расіі. Да паслуг пастаяльцаў сапраўдная руская лазня, да стала – прадукты з падсобнай гаспадаркі, у якой ёсць авечкі, свінні, козы, трусы, куры, індычкі, а для жадаючых арганізуецца яшчэ паляванне і рыбалка.

Раённая ветэрынарная станцыя ў маі аказала дапамогу 200 хворым жывёлам. Штомесяц тут праходзяць вакцынацыю ад розных захворванняў ад 30 да 70 хатніх гадаванцаў, сярод якіх усё часцей можна сустрэць экзатычных чарапах, тушканчыкаў і тхароў. Візіт да “жывёльнага доктара” — ад 8 да 100 тысяч рублёў.

У Свіслацкім сельсавеце вядзецца актыўная работа па замене і рамонце агароджы: у Красным – 300, у Чуччы – каля 100 метраў, а на вуліцы Кліменкі ў аг. Свіслач драўляныя платы ўжо заменены бетонна-шчытавымі. У мемарыяльным комплексе старыя памятныя пліты хутка будуць заменены на новыя — са штучнага мармуру.

Жыхары  Каменіч і Краснага да высакахуткаснага інтэрнэту byfly і інтэрактыўнага тэлебачання ZALA змогуць падключыцца ў ліпені – ужо завершана пракладка аптавалаконных ліній і пачаты мантаж абсталявання.

Па выніках штогадовага фотаконкурсу “Зямля пад белымі крыламі» ў намінацыі «Раслінны і жывёльны свет” пераможцам стаў Дзмітрый Саўрыцкі, 2 месца падзялілі Андрэй Чыжык і Анастасія Міхадзюк, 3-е – Таццяна Цюлькова і Надзея Цімохіна. Лепшай у намінацыі «Пейзаж» названа Алена Ерашэвіч, другім – Яўген Чыжык, а «бронза» дасталася Ніне Царык і Таццяне Цюльковай. Дыпломам узнагароджаны і Дзяніс Ерашэвіч – самы юны ўдзельнік конкурсу.