8790 цялушак і бычкоў плануецца атрымаць сёлета ў гаспадарках раёна. За студзень-сакавік на асіповіцкіх фермах з’явілася 2692 цяляці.

87,6 тоны малака здадзена на перапрацоўку за I квартал жыхарамі раёна, якія маюць кароў на ўласным падворку.

Больш зручна стала дабірацца землякам да абласнога цэнтра: з гэтага тыдня туды па панядзелках, аўторках, чацвяргах і пятніцах ходзіць маршрутнае таксі аўтапарка № 19. Кошт праезду ў адзін бок — 8 рублёў.

18 тысяч трохлітровых слоікаў бярозавіку сышло бягучым сезонам з канвеера ААТ “Асіповіцкі кансервавы завод”. Пераважную большасць складае сок з цукрам. Ёсць і купажыраваныя — з апельсінам і з лімонам.

Каманда вучняў СШ № 4 стала пераможцай раённага конкурсу юных інспектараў руху, які адбыўся на канікулах. Другое месца ў рабят з СШ №2, трэцяе — у вяззеўскіх школьнікаў. Уладальнікі Дыплома I ступені будуць удзельнічаць 11 красавіка ў занальных спаборніцтвах у Бабруйску.

За студзень-сакавік Асіповіцкім вытворчым участкам ААТ “Бабруйскі камбінат хлебапрадуктаў” выпушчана 9500 тон мукамольнай прадукцыі — 113% да аналагічнага леташняга паказчыка — і 6000 тон круп (128%). У тым ліку 3300 тон — 186% да I квартала 2016 года — гэта ячка і пярлоўка.

Новая сувенірная прадукцыя з’явілася нядаўна ў кіёсках Асіповіцкага філіяла ААТ “Магілёўсаюздрук”. Гэта кружкі з ялізаўскімі краявідамі, магніты з выявамі пасёлка шкларобаў і Прошчы.

Тыдзень лесу. У рамках акцыі “Тыдзень лесу”, якая прайшла ўжо ў дзясяты раз, работнікі Камітэта дзяржкантролю вобласці высаджвалі дрэвы ў Магілёўскім лясніцтве. У агульным — амаль 4 тысячы сеянцаў сасны і елкі на плошчы больш за адзін гектар.

Для Ясенскага сельвыканкама сакавік прайшоў пад знакам добраўпарадкавання. Накіравана 40 прадпісанняў, з іх 17 — юрыдычным асобам і 23 — уладальнікам прыватных домаўладанняў. Ліквідавана 9 несанкцыянаваных сметнікаў, знесена 120 м сапсаванага паркана, 2 спарахнелыя дамы, спілена 5 аварыйных дрэў. Наведзены парадак на 2 могілках, вядуцца работы па прыбіранні 17 воінскіх пахаванняў.