31 мая — апошні дзень праваднога радыёвяшчання ў нашым раёне. Райвузлом электрасувязі насельніцтву рэалізавана ўжо каля 400 УКХ-прыёмнікаў, і попыт на іх устойліва трымаецца. Дарэчы, набыць патрэбнае “радыё” можна і ў гандлёвай сетцы.

Новы фільм аб Асіповіччыне ствараецца ў гэтыя дні тэлерадыёкампаніяй “Магілёў”. Ужо адзняты матэрыял у горадзе і раёне, ідзе мантаж стужкі. Яе працягласць — 25 хвілін.

Больш за два дзясяткі працаўнікоў сельгаспрадпрыемстваў будуць удзельнічаць у летняй спартакіядзе, якая пройдзе напрыканцы чэрвеня ў Касцюковічах. Найбольш актыўная гаспадарка — філіял “Белшына-агра” ААТ “Белшына”, адкуль у спартыўную зборную запісалася 7 чалавек.

Чарговы поспех прынёс бягучы месяц школе танца Дзіяны Шатанавай: на Міжнародным фестывалі па танцавальным шоу “Мегаданс 2014” “Дамскі капрыз” адзначаны двума Дыпломамі I ступені, трэцяе месца заняла і малодшая група.

Найбольш папулярны ўклад сярод асіповіцкіх кліентаў ААТ   “Белаграпрамбанк” — “Старт”: 35% гадавых у беларускіх рублях і 4,5 — у доларах ЗША і еўра. Апошнім часам землякі больш увагі сталі надаваць і манетам Нацыянальнага банка Рэспублікі Беларусь, кошт якіх мае шырокі дыяпазон — ад некалькіх тысяч да дзясятка мільёнаў рублёў.

10 адзінаццацікласнікаў са школ горада і раёна — 2 юнакі і 8 дзяўчынак — маюць шанс сёлета стаць медалістамі пасля паспяховай здачы выпускных экзаменаў. Няхай фартуна суправаджае і на завяршальным этапе!

Майстар-клас па распілоўцы дрэў бензапілою “Stihl 460” паказаў у час правядзення 15-й міжнароднай спецыялізаванай выставы “Лесдревтех” у сталіцы вальшчык лесу з Дараганаўскага лясніцтва Дзмітрый Караткевіч.

Працягваецца падпіска на перыядычныя выданні на II паўгоддзе. Рэспубліканскія газеты і часопісы можна  выпісваць да 25 чэрвеня, друкаваную прапанову расійскіх СМI — да 20. Ну а перш-наперш варта набыць абанемент  на “раёнку”!