Шмат клопатаў зараз у аграрыяў: распачалася актыўная фаза вясновых палявых работ. У гаспадарках раёна вядзецца падрыхтоўка глебы пад сяўбу і непасрэдна сама сяўба, у тым ліку шматгадовых траў, уносяцца мінеральныя ўдабрэнні і арганіка, вядуцца работы па закрыцці вільгаці, ідзе падкормка азімых азотам. Да кожнага поля індывідуальны падыход, які залежыць і ад стану глебы, і ад таго, насенне якой культуры прыме зямля.

Ужо шмат гадоў Анатоль Крот — галоўны сейбіт у ААТ “Асіповічыаграпрамтэхзабеспячэнне”. Вось і сёлета 200 гектараў яравога збожжавага кліну даручана пасеяць менавіта яму. І ў тым, што на трактары “Беларус-3522” працуе пераважна гэты трактарыст-машыніст, ёсць свае плюсы: тэхніка ў адных руках заўсёды функцыянуе больш спраўна. Трактар выйшаў у поле шосты сезон, а вось сеялка RABE Mega Seed служыць ужо з 2007 года. На той час гэта быў увогуле найсучаснейшы агрэгат. І зараз такіх у нашым раёне ўсяго два. Сеялка спраўная — таксама немалая заслуга Анатоля Уладзіміравіча.

— Настрой добры, — дзеліцца механізатар, якога засталі на 38-гектарным полі “Астроўкі”, — і без адпаведнага запалу сеяць нельга. Толькі са станоўчымі думкамі! Калі хочаце, любая справа патрабуе свайго натхнення.

— Хоць асноўнай у нас была сяўба азімых — 670 гектараў, аднак не менш адказны перыяд і зараз, — дзеліцца галоўны аграном гаспадаркі Ганна Даманеўская. — Прэвалюючая яравая збожжавая культура ў нас ячмень — яго будзе 160 гектараў, 40 зойме авёс. Калі прыйдзе час, пасеем яшчэ 720 гектараў кукурузы. Надвор’е, у прынцыпе, стаіць спрыяльнае і дазваляе правесці сяўбу ў аптымальныя тэрміны. Стараемся выконваць усе агратэхнічныя патрабаванні, каб атрымаць добры ўраджай. Тэхніка слухаецца, механізатар вопытны. Так што, думаю, збожжа ўродзіць добра.

Няхай так і будзе!