Вынікі конкурсу на лепшага арганізатара падпіскі-2015 на раённую газету, арганізаванага райвузлом паштовай сувязі і рэдакцыяй “Асіповіцкага краю”, прынеслі перамогу аддзяленню паштовай сувязі Пратасевічы: тут аформлена 86 даставачных картак — на 21 больш, чым за аналагічны леташні перыяд — 132%. Прыплюсавалі ў колькасці экзэмпляраў мясцовага выдання гарадскія аддзяленні сувязі  №№ 4, 2, таксама кажам дзякуй паштавікам з Ялізава, Цэлі, Дрычына, Вязаўніцы. Не стала менш падпісчыкаў “АК” і ў Татарцы, Ручаі, Ясені, Каменічах, Карытным, Красным.

Павіншаваўшы невялікі калектыў Пратасевіцкага АПС, які складаецца з загадчыцы Ніны Манёнак (на здымку злева) і паштальёна Таццяны Чэчат, пацікавіліся, якім чынам удалося павялічыць рады прыхільнікаў “раёнкі” на сваім участку. Сакрэтаў ніякіх няма: проста трэба лішні раз прапанаваць чалавеку аформіць абанемент, пры неабходнасці зайсці дадому. Ну а наконт зместу газеты, то тут кожны ведае, што ў “АК” можна знайсці самую розную інфармацыю аб жыцці горада і раёна, тэматычныя старонкі на любы густ.

Давайце і далей заставацца разам!