У конкурсе прафесійнага майстэрства Алена Міхайлаўна ўдзельнічае ўжо шосты раз. У аддзяленні першай станавілася не аднойчы, а сёлета ўмеламу спецыялісту пакарылася і найбольш пачэсная вяршыня.

У Цэнтры ўпраўлення перавозкамі сабраліся лепшыя аператары са ўсіх аддзяленняў чыгункі. Спаборніцтвы праходзілі ў два этапы. На першым неабходна было з дапамогай камп’ютарнай праграмы прадэманстраваць тэарэтычныя веды. Алена менш чым за пяць хвілін справілася з усімі заданнямі, набраўшы самы высокі бал. У ходзе другога тура ўдзельнікі павінны былі адказаць на вусныя пытанні членаў камісіі, якія датычылі не толькі прафесійных абавязкаў, але і бяспекі руху, аховы працы, супрацоўніцтва з сумежнымі гаспадаркамі — вагоннай, пуцейскай і інш.

— Работнікам службы руху да напружанага рэжыму працы не прывыкаць, — каменціруе свой поспех Алена Міхайлаўна. — Нам штодзённа даводзіцца рашаць масу разнастайных задач. І таму ўсе ўдзельнікі прадэманстравалі высокі ўзровень прафесійных ведаў. У мяне атрымалася крыху лепей.

Алене падабаецца ўдзельнічаць у падобных конкурсах. І не толькі таму, што гэта цікавая і азартная справа, але і таму, што ёй папярэднічала грунтоўная падрыхтоўка, паўтор інструкцыйных матэрыялаў. Інакш кажучы, міні-курсы па павышэнні ўласнай кваліфікацыі. А яшчэ гэта і пацвярджэнне высокай якасці работы станцыі Асіповічы-1, на якой Алена працуе з 2010 года.

Па адукацыі Алена эканаміст. Але па сямейных абставінах вырашыла памяняць сферу дзейнасці і прыйшла на чыгунку, дзе працавалі родныя яе мужа. Пачынала прыёмаздатчыкам грузу і багажу. Потым была накапляльнікам тэхканторы, а пасля спецыяльнага навучання стала аператарам СТЦ.

Працуе з дакументамі на вагоны, якія адпраўляюцца са станцыі. А яшчэ курыруе саставы, якія фарміруюцца на станцыі Ялізава. Аб’ём работы вялікі, але для сапраўднага прафесіянала, якім з’яўляецца Алена Сукора, невырашальных задач няма. І вынікі конкурсу — чарговае таму пацвярджэнне.