У раённым гісторыка-краязнаўчым музеі адкрылася выстава значкоў “Сімвалы мінулай эпохі”

Дэманструецца частка калекцыі Юрыя Абмоіна — каля трох тысяч экзэмпляраў.

Фалерыстыкай, ці зборам значкоў і ўзнагарод, калекцыянер займаецца ўжо шосты дзясятак гадоў. Гэта адно са шматлікіх захапленняў вядомага асіповіцкага краязнаўцы. Прадстаўленыя для экспанавання значкі адлюстроўваюць інтарэс Юрыя Міхайлавіча да спорту. Гэта знакі, прысвечаныя ўніверсіядам і спартакіядам народаў СССР, разрадныя і ўзнагародавыя за прафесійныя дасягненні, масавыя сувенірныя. А яшчэ знакі навучальных устаноў, юбілейныя знакі воінскіх часцей, камсамольскай тэматыкі.

Асобны раздзел асвятляе Алімпіяду-80, пра якую калекцыянер расказаў з асобым піетэтам, бо што такое алімпійская Масква, даведаўся асабіста. У студэнцкія гады Юрый з таварышам пабывалі на алімпіядзе, прыхапіўшы з сабой невялічкі тэлевізар, так што ўражанні ад галоўнай спартыйнай падзеі чатырохгоддзя ў хлопцаў былі найбольш поўнымі. Шмат цікавых знаёмстваў адбылося тады, пазнаёміўся з некаторымі славутымі спартсменамі. І як вынік — цэлая падборка знакаў, некаторыя з якіх атрымаў асабіста ад выбітных атлетаў.

На ўрачыстым адкрыцці прысутнічалі землякі, якія неабыякавыя да гісторыі роднага краю і шмат робяць для яе захавання і папулярызацыі. Трэба адзначыць, што на музейныя мерапрыемствы пастаянныя наведвальнікі звычайна прыходзяць не з пустымі рукамі. Фонды ўстановы атрымалі чарговае папаўненне: бязмен і бухгалтарскія лічыльнікі.

Выстава будзе працаваць па 29 кастрычніка. У памяць аб ёй госці могуць зрабіць здымкі ў фотазоне, інтэр’ер якой уяўляе рабочы кабінет сур’ёзнага калекцыянера.