Калі кожны дзень цікавы

Уласны дом, свой надзел зямлі, неабходная тэхніка — такія прыярытэты мае гэта дружная сям’я. Што паўплывала на выбар? Магчыма, якраз тое, што самі выхадцы з сяла: Крысціна нарадзілася і вырасла ў Каўгарах, яе муж — у Краях. Абодва перакананы, што Дараганаўшчына — лепшае месца для жыцця, а мясцовыя карані сапраўды даюць сілы, каб памнажаць і ўмацоўваць свой род.

Канечне, як і ў іншых, усё з’явілася не адразу. Спачатку набылі жыллё ў Краях, потым вырашылі пераехаць у Каўгары. З цягам часу куплены тут дом становіцца ўсё больш добраўпарадкаваным, засталося ўдасканаліць частку жылплошчы — і будзе не горш за гарадскую кватэру. Толькі значна лепшыя адчуванні, чым у жыхароў шматпавярховак: тое, што бачыш за акном, таксама належыць табе.

Зараз Крысціна ў складзе малодшага медперсаналу Дараганаўскай бальніцы, а Кірыл працуе вальшчыкам лесу ў Фаліцкім лясніцтве. За час сумеснага жыцця нарадзіліся сынкі Цімафей і Мацвей. Маладая матуля згаджаецца, што ў выхаванні хлапчукоў павінен быць галоўным тата. Па-першае, яго мужчынскае слова больш ёмкае. Па-другое, з малых гадоў можа навучыць сыноў мужчынскім заняткам. Кірыл сам цікавіцца тэхнікай, прывівае інтарэс да яе і дзецям. Ёсць у гаспадарцы трактарэц, зроблены ўласнымі рукамі, — згадзіцеся, не кожнаму пад сілу такое вынаходніцтва. У наяўнасці аўтамабіль і матацыкл — “круціць гайкі” ёсць на чым. Нярэдка даводзіцца працаваць і са сталяркай — і такія навыкі таксама карысныя. Так што малым з татам ніколі не бывае сумна, а якія інструменты для чаго служаць, хлопчыкі добра ведаюць ужо зараз.

Па доглядзе за гаспадаркай юным вяскоўцам таксама ёсць “практыка”: у хляве жыве вясёлы курыны клан, а ў хуткім часе тут паселіцца яшчэ і парсючок.

У мамы, акрамя агарода і ўсяго, што з ім звязана, свае заняткі. Яна любіць пачаставаць сынкоў і мужа якой-небудзь хатняй выпечкай. Усё разлятаецца ўмомант, асабліва беляшы і пячэнне. Стварэнне ўтульнасці ў доме — таксама прэрагатыва гаспадыні. У вольны час яна займаецца маляваннем карцін, вышыўкай. Усякая зробленая сваімі рукамі рэч упрыгожвае дом, робіць яго адметным, сваім.

На пытанне, ці існуюць сакрэты сямейнага шчасця, Крысціна адказала, што ў кожнай сям’і яны свае. Ды

і сакрэтамі гэта не назавеш: проста трэба адзін аднаго паважаць ды ўлічваць інтарэсы блізкага чалавека.

А нядаўна ў жыцці сям’і адбылася яркая падзея: усе разам удзельнічалі ў раённым этапе рэспубліканскага сельскагаспадарчага праекта “Уладар сяла-2023”. І выступілі паспяхова — больш за ўсіх набралі балаў! Канечне, хваляваліся, каб прадставіць Дараганаўшчыну на да-стойным узроўні. Чым багацейшая палітра кожнага дня — тым цікавей жыццё.