Малады спецыяліст

Прафесія на ўсе часы

Ганна прыехала ў наш раён мэтанакіравана: тут працуе яе муж. Яны абодва з Магілёва, і, калі малады чалавек тры гады таму па размеркаванні трапіў на філіял “Асіповіцкі” ААТ “Бабушкина крынка”, студэнтка Магілёўскага дзяржаўнага эканамічнага прафесійна-тэхнічнага каледжа вырашыла, што таксама абавязкова знойдзе першае месца працы ў нашым раёне. Так летась ААТ “Асіповіцкі КБА” атрымаў маладога спецыяліста.

— З калектывам пазнаёмілася яшчэ вясной, калі праходзіла тут практыку, — расказвае дзяўчына. — Таму праблем з адаптацыяй не было. Я цырульнік чацвёртага і швачка трэцяга разраду. Заўсёды падабалася рабіць прычоскі. Вучылася з задавальненнем і жадала працаваць цырульнікам. Месца для размеркавання знайшла сама, каб прыехаць менавіта сюды. Але прарабіўшы першыя два месяцы, зразумела, што пастаянныя зносіны з людзьмі — не маё. Справа ў тым, што многія кліенты жадаюць паразмаўляць, пакуль іх валасы набываюць прыгожы выгляд. Цырульніку трэба знаходзіць агульную мову і падыход да кожнага чалавека. Гэта асаблівы талент, і ён не ўсім дадзены. Таму перайшла ў швейны цэх. Тут мне больш падабаецца. Калектыў невялікі, дружны, гатовы прыйсці на дапамогу. Шыю ў асноўным рабочую вопратку. На жаль, прастору для творчасці няма. Затое атрымліваю неабходны вопыт і руку набіваю. Работу сваю люблю: мала хто задумваецца аб тым, хто шые адзенне, але справа гэта ніколі не страціць сваёй актуальнасці і неабходнасці.

Жывуць маладыя ў службовай кватэры, якую атрымаў муж. Канечне, адразу без сяброў і знаёмых было не па сабе. Аднак на новым месцы Ганне спадабалася.

— Даволі прыгожы горад, ціхі і спакойны. Пасля вялікага, шумнага і мітуслівага Магілёва кампактныя Асіповічы здаюцца вельмі зручнымі. Паволі з’яўляюцца знаёмыя і сябры. У другім горадзе будуеш сваё жыццё па–новаму. Улетку заканчваецца мой тэрмін адпрацоўкі, але пераязджаць не збіраюся. Ужо прывыклі, што з блізкімі людзьмі маем зносіны толькі на адлегласці. Прыехаць да іх не дазваляе рэжым працы: у мужа два дні праз два, а я працую штодня, акрамя суботы і нядзелі. Вось і атрымліваецца, што нашы выхадныя часта не супадаюць. Нават Новы год сустракалі тут. Асіповічы сталі для нас домам, вельмі падабаецца і навакольная прырода. Жывём каля лесу, таму часта гуляем сярод соснаў. А хутка і лета — плануем пазнаёміцца з краявідамі раёна.