Перапрацоўка

Малочныя рэкі, сырныя берагі

Майстар вытворчага ўчастка Крысціна Магілявец надае сыру шмат увагі

Яна прыйшла ў філіял “Асіповіцкі” ААТ “Бабушкина крынка” па размеркаванні. Адразу працавала ў натуральнамалочным цэху, потым перайшла на выраб сыроў. Кошт гэтага смачнага і разнастайнага прадукту Крысціна ведае не толькі па цане ў магазінах, але і па цяжкасці яго прыгатавання. Тэхналогія варкі сыроў патрабуе шмат увагі і часу. Толькі на падрыхтоўку гатовай сумесі затрачваецца больш за паўтара сутак, а потым яшчэ разліў у формы, вытрымка пад прэсам, каб выйшла лішняя вільгаць, вытрымка ў расоле, абсушка і паспяванне. Будзе гэта тыдзень ці больш, ужо залежыць ад гатунку і віду прыгатаванага прадукту. Ды і сыравіны трэба нямала: прыкладна з 10 тон гатовай сумесі атрымоўваецца адна тона сыру.

— Кожны від мае не толькі асабістыя пах, смак і кансістэнцыю, але і малюнак, — расказвае дзяўчына. — Разнастайнасць вялікая, бо падзяляецца яна па масавай долі тлушчу ў сухім рэчыве, скла-дзе і спосабе паступлення ў формы. Апошні, дарэчы, і надае сыру асабісты малюнак. Калі, напрыклад, гатовая сумесь паступае ў формы насыпным спосабам, то на выха-дзе прадукт мае “карункавы” малюнак. А вось пры наліўным — сыр практычна “сляпы”. Увогуле, прыгатаванне сыру вельмі доўгі і цікавы працэс. Ён патрабуе пільнага догляду. Гэты прадукт нельга  пакінуць па-за ўвагай нават у перыяд паспявання. Трэба трымаць на кантролі тэмпературны рэжым і рэгулярнае пераварочванне “галоў”.

Сыр вельмі люблю. Ён смачны сам па сабе і ў складзе розных страў. Таксама цікава вызначаць якасць на смак. Бо хочаш не хочаш, а калі ведаеш усю тэхналогію вырабу, то падсвядома адчуваеш моцныя і слабыя бакі прадукту. Час ад часу варта спрабаваць сыры і іншых вытворцаў — у прафесійных мэтах. Бо, як у розных гаспадынь адна і тая ж страва атрымліваецца па-рознаму, так і ў вытворчасці кожны мае свой асабісты сакрэт-разыначку. Але ж прадукт, выраблены сваімі рукамі, заўсёды найсмачнейшы.