Своеасаблівы экзамен па сваім майстэрстве здавалі напярэдадні навагодніх свят механізатары з сельгаспрадпрыемстваў Асіповіччыны. Ужо традыцыйна гэты конкурс прайшоў на базе СВК “Калгас “Авангард”, памяшканне для тэарэтычных іспытаў прадаставіў Вяззеўскі сельсавет, а арганізатарамі маладзёжнага спаборніцтва выступілі аддзел ідэалагічнай работы, культуры і па справах моладзі райвыканкама, райкамы ГА “БРСМ” і прафсаюза работнікаў АПК.

Каб стаць пераможцам прафесійнага першынства, маладыя механізатары павінны былі паказаць добрыя веды ў тэсціраванні па правілах дарожнага руху і тэхнічнай эксплуатацыі трактароў, фігурным ваджэнні, зборцы і разборцы гідраўлічнай помпы.

Самыя грунтоўныя тэарэтычныя веды прадэманстравалі “белшынавец” Алег Ганчаронак, Сяргей Снігір з ААТ “Ясень-АГРА” і Дзмітрый Карпянюк з калгаса “Новы шлях”. Найбольш віртуозна кіравалі “жалезным канём” механізатар ААТ “ЖорнаўкаАГРА” Аляксандр Баранаў, Юрый Пярвушын з ААТ “Бярэзіна-Агра-Люкс” і “авангардавец” Андрэй Жукоўскі.

Пасля ўсіх этапаў у агульным выніку месцы размеркаваліся так: званне перможцы ў чарговы раз заваяваў Сяргей Снігір — хлопцу ў гэтым дапамагло ў тым ліку і адточанае ўменне працаваць з ключом, на другой прыступцы — Юрый Пярвушын, а трэці дыплом атрымаў Дзмітрый Карпянюк. Усе без выключэння ўдзельнікі атрымалі заахвочвальныя прызы, а пераможцы яшчэ і дадатковыя падарункі.

— Год завяршаецца прыемным момантам: павязу дадому яшчэ адну ўзнагароду, — падзяліўся лідар Сяргей Снігір, — спадзяюся, што паўдзельнічаю ў конкурсе і ў 2016-м. Хочацца, каб наступны сезон быў больш шчодрым на ўраджай — мы, механізатары, пастараемся для гэтага зрабіць усё магчымае.

Валянціна КОРБАЛЬ.