На яе былі запрошаны дзяўчаты і юнакі, што працуюць на розных прадпрыемствах і ва ўстановах. Прысутнічалі і намеснікі кіраўнікоў, якія непасрэдна курыруюць работу з маладымі кадрамі.

На мерапрыемстве разглядаліся розныя пытанні, якія цікавяць маладых людзей, а іх на Асіповіччыне пражывае амаль сем тысяч. Намеснік старшыні райвыканкама Ганна Землянухіна акцэнтавала ўвагу на тым, што аддзелы і службы райвыканкама надзяляюць увагу маладзёжнай палітыцы, але не кожны малады спецыяліст ведае свае правы і абавязкі. Таму арганізоўваюцца падобныя сустрэчы, якія дазваляюць павысіць дасведчанасць моладзі, сарыентаваць яе, куды і з якімі праблемамі можна звяртацца ў розных сітуацыях.

Начальнік аддзела арганізацыйна-кадравай работы Жанна Сандрос пазнаёміла маладых землякоў з фарміраваннем кадравага рэзерву раёна. Зараз у ім знаходзіцца 59 чалавек. Кожны з юнакоў і дзяўчат можа папоўніць гэты “залаты запас”, калі будзе мець здаровыя амбіцыі, схільнасць да кіруючай работы і жаданне развіваць тую галіну, у якой працуе. Кожны, хто добра праявіў сябе, будзе прыкмечаны і атрымае магчымасць поўнай самарэалізацыі.

Кіраўнікі і спецыялісты іншых аддзелаў пазнаёмілі ўдзельнікаў сустрэчы з сістэмай дзяржпадтрымкі моладзі, расказалі, якая матэрыяльная дапамога выплачваецца пры нараджэнні дзяцей; на што можна спадзявацца маладым сем’ям, якія хочуць атрымаць арэнднае жыллё; як распараджацца адраснай сацыяльнай дапамогай; што неабходна, каб атрымаць кватэру ў 84-кватэрным доме, які зараз будуецца; асвяцілі і іншыя актуальныя пытанні. А спецыяліст “Беларусбанка” пазнаёміў з крэдытнай праграмай для моладзі. Напрыклад, многія маладыя спецыялісты зараз маюць права на атрыманне крэдыту (на 5 гадоў на сёння — пад 3%) на набыццё хатняй маёмасці (Указ Прэзідэнта краіны ад 27.11.2000 г. № 631 «Аб дадатковых мерах па павышэнні зарплаты і прадастаўленні льготных крэдытаў асобным катэгорыям грамадзян»).

Здараецца, што, скончыўшы пэўную навучальную ўстанову і паспрабаваўшы працаваць па выбранай прафесіі, чалавек разумее, што памыліўся. У такіх сітуацыях працягвае руку дапамогі служба занятасці: яна прапаноўвае перанавучанне на рабочыя прафесіі за бюджэтны кошт. Некаторым маладым людзям такім чынам вяртаюць веру ў сябе і падказваюць напрамак далейшай дзейнасці. Дапамагаюць знайсці і першае рабочае месца тым, хто вучыўся за ўласныя сродкі і, адпаведна, не атрымаў размеркавання. Яшчэ адзін даволі запатрабаваны від дапамогі — субсідзіраванне для пачынаючых індывідуальных прадпрымальнікаў.

Гаварылася пра многае. Правядзенне вольнага часу і ўмовы пражывання ў інтэрнатах, заняткі спортам і грамадскую работу. Галоўнае, моладзь Асіповіччыны атрымала адрасы і тэлефоны, на якія трэба звяртацца, калі патрэбна кансультацыя па тым ці іншым пытанні.