Словы падзякі

У краіне стартавала рэспубліканская патрыятычная акцыя ГА «БРСМ” і «БРПА”, прысвечаная 9 Мая. Сімвал патрыятычнага праекта — чырвоная зорка з надпісам «Дзякуй за Перамогу!”. Асіповіцкія піянеры і сённяшнія камсамольцы павіншуюць ветэранаў Вялікай Айчыннай вайны з Днём Перамогі, уручаць ім паштоўкі з пажаданнямі ад моладзі, сувеніры. А валанцёры руху БРСМ «Добрае сэрца” і цімураўцы акажуць удзельнікам вайны пасільную дапамогу ў побыце.

Святочная эстафета

Школьнікі горада і раёна ў святочны дзень прымуць удзел у спартыўнай эстафеце, прысвечанай Дню Перамогі. Старт лёгкаатлетычнага кросу адбудзецца недалёка ад помніка на брацкай магіле савецкіх воінаў, партызан і ахвяр фашызму каля вёскі Цяплухі. Спаборніцтва пройдзе ў восем этапаў, а пераможцы атрымаюць граматы і грашовыя прэміі.

Стужка-сімвал

Больш сотні аранжава-карычневых стужак падрыхтуюць актывісты райкама ГА «БРСМ” у рамках традыцыйнай акцыі «Георгіеўская стужка”. Сімвалы Перамогі будуць прымацаваны да адзення ветэранаў Вялікай Айчыннай вайны, ганаровых гасцей і гараджан, якія прымуць удзел у святочным мітынгу.

Стрытбол

Падчас святкавання 9 Мая вучні школ горада паспаборнічаюць на вулічных баскетбольных пляцоўках на прызы ФСК «Алімпія”. Плануецца, што ў гарадскім парку збяруцца пяць аматарскіх каманд, якія пакажуць сваё майстэрства валодання аранжавым мячом.

Даніна павагі

Штогод вучні раённых навучальных устаноў уносяць свой уклад у даніну павагі і памяці аб гераічных падзеях Вялікай Айчыннай вайны.
Цэльскія школьнікі сумесна з ваеннаслужачымі 465-й ракетнай брыгады ў перадсвяточныя дні рыхтуюць правядзенне тэатралізаванай рэканструкцыі подзвігу Аляксандра Матросава. А падзеі вызвалення вёскі Лапічы для воінаў 36-й дарожна-маставой брыгады ўзновяць вучні мясцовай школы. Акрамя гэтага, лапіцкія школьнікі правядуць акцыі «Абеліск” і «Ветэран жыве побач”, арганізуюць літаратурна-музычную кампазіцыю «Паклонімся вялікім тым гадам”.

Сем дзён памяці

У ММПЦ «Равеснік” праходзіць тыдзень баявой Славы. Юнакі і дзяўчаты займаюцца добраўпарадкаваннем замацаваных за маладзёжным цэнтрам помнікаў, наведваюць падшэфных ветэранаў. А напрыканцы мая ўдзельнікі спартыўна-патрыятычнага клуба «Беларусь” адправяцца ў пазнавальны паход па месцах баявой славы Асіповіччыны.
Падрыхтавала
Нэлі АСТРЭЙКА.