Апошнія дні года — час рознабаковага аналізу, падвядзення вынікаў і стварэння планаў на наступны перыяд. І, лічу, вельмі своечасова прайшла ў мінулую пятніцу сустрэча старшыні абласнога выканаўчага камітэта Анатоля Ісачанкі і першага намесніка міністра інфармацыі Андрэя Кунцэвіча з кіраўнікамі СМІ Прыдняпроўскага краю. Яе галоўнай мэтай было разам абмеркаваць актуальныя пытанні ўдасканалення рэгіянальных сродкаў масавай інфармацыі і вызначыць меры па іх перспектыўным развіцці.

Анатоль Ісачанка адзначыў, што ўсе ўмовы для эфектыўнай дзейнасці СМІ ў рэгіёне створаны, і гэта сапраўды так. Справа застаецца за рэдакцыямі. “Трэба перастройваць сваю работу, асвойваць і ўкараняць сучасныя тэхналогіі, адэкватна і аператыўна адказваць на эканамічныя і палітычныя выклікі нашай краіне, падымаць вострасацыяльныя праблемы”, — лічыць губернатар.

“Друкаваным СМІ сёння неабходна ўкараняць больш цікавую падачу тэм і пазбягаць шаблонаў”, — параіў Андрэй Кунцэвіч, які і сам некалі не адзін год узначальваў раённае выданне. І з усім сказаным нельга не пагадзіцца. Безумоўна, ёсць над чым працаваць і “Асіповіцкаму краю”.

Чаму хочацца расказаць вам пра сустрэчу, паважаныя землякі? Таму што рэдакцыя працуе для свайго чытача, і нам важна таксама і ваша меркаванне. Часткова мы яго ведаем: праведзенае нядаўна апытанне ў сацыяльных сетках паказала, што вам хацелася б бачыць на старонках газеты больш крытычных матэрыялаў, больш якасных і цікавых фота.

Раз размова пайшла ў рэчышчы супрацоўніцтва з чытачом, то нагадваем, што вы можаце звяртацца са сваімі пытаннямі і прапановамі на гарачую лінію рэдакцыі 56-3-85 або на тэлефон галоўнага рэдактара 56-3-90. Давайце разам рабіць нашу з вамі газету больш цікавай і змястоўнай!

Асобны дзякуй тым, хто не забыў выпісаць сваю раёнку і на 2023-ці. З надыходзячымі святамі ўсіх! Шчасця, ажыццяўлення мар, натхнення і новых здзяйсненняў, няхай наступны год прыносіць усім нам толькі добрыя навіны!