Сяргей Максіменка 6 гадоў працуе ў Асіповіцкім раёне газазабеспячэння філіяла “Бабруйскае вытворчае ўпраўленне” РУП “Магілёўаблгаз”. Спачатку майстрам па ўліку і дастаўцы звадкаванага газу, а пасля рэарганізацыі — механікам.

Кантралюе працэс забеспячэння балонамі 7 360 спажыўцоў, сочыць за выхадам на лінію тэхнікі, прыёмам і абслугоўваннем заказаў. Выконвае абавязкі лагіста, бо неабходна рацыянальна расходаваць паліва — каля 3,5 км на 1 балон.

У дзень кожная машына развозіць у сярэднім 46 газавых балонаў. З дня паступлення заяўкі і да моманту дастаўкі ў горадзе павінна праходзіць не больш за 3 дні,              на раёне — тыдзень, пры наяўнасці 2 балонаў — а гэта пятая частка спажыўцоў — дапусцімы ўдвая большы тэрмін.

У рэйс Сяргей Іванавіч штодзённа адпраўляе 2 машыны, у кожнай — брыгада з двух чалавек, якія, акрамя дастаўкі газу, правяраюць працаздольнасць абсталявання і пры неабходнасці рамантуюць яго. Напрыклад, могуць замяніць шланг, рукаў і нават газавую пліту ці варачную панэль. Выяўляюць уцечку газу, калі такая мае месца, выдаюць прадпісанні ў выпадку няправільнага захоўвання балона ці эксплуатацыі пліты звыш гарантаванага тэрміну эксплуатацыі.

Сёлета абслужылі 409 разнастайных заявак, замянілі 224 газавыя пліты.

Сваім невялікім калектывам механік задаволены: працуюць зладжана. А кіраўніцтва раёна забеспячэння бачыць у тым немалую заслугу Сяргея Максіменкі, якога лічыць сапраўдным майстрам справы.