Ніна Аляксандраўна і Пётр Міхайлавіч Аўчыннікавы нядаўна адзначылі 50 гадоў сумеснага жыцця

Моладзь 70-х гадоў знаёмілася ў розных месцах: на танцпляцоўках, камсамольскіх будоўлях, у час наведвання нейкіх мерапрыемстваў. А для Ніны і Пятра месцам знаёмства стаў аўтапарк, да працы ў якім яны прыступілі паўстагоддзя таму. Малады майстар-механік заўважыў неяк у тэхаддзеле прыгожую 19-гадовую дзяўчыну, пазнаёміліся, а потым разам ездзілі на сесіі. Зразумелі, што ў іх шмат агульнага, і наогул паасобку ўжо не ўяўлялі жыцця. Таму хутка адносіны хлопца і дзяўчыны перайшлі на новую стадыю. Стварылі сям’ю. Распісаліся на стары Новы год, з той пары гэта свята для іх мае асаблівы сэнс.

Абое выраслі ў Асіповічах — яна на Ленінскай вуліцы, ён на Стэльмаха — і лагічна вырашылі месца жыхарства не змяняць, атабарыцца там, дзе жывуць бацькі, родныя і сябры, дзе знаходзіцца любімая работа. Дарэчы, Пётр Міхайлавіч шмат гадоў прысвяціў аўтапарку. Працаваў інжынерам па бяспецы руху, галоўным інжынерам. Атрымаўшы ў арміі прафесію аўтамеханіка, займаўся любімай справай усё жыццё, удасканальваючы майстэрства ў час далейшай вучобы па выбранай спецыяльнасці. Дапамог і багаты вопыт работы з тэхнікай і, канечне ж, людзьмі, якія на ёй працуюць. Займаўся і грамадскай работай, напрыклад, узначальваў камсамольскую арганізацыю. Удастоены медаля “Заслужаны транспартнік Беларусі”. З гонарам успамінае, што ў 80-х гадах іх арганізацыя налічвала 120 грузавых аўтамабіляў, 54 аўтобусы, пяць таксі. Абслугоўвалі ўсе арганізацыі горада і раёна. Ніна Аляксандраўна ўзначальвала аўтастанцыю, а потым працавала ў аўтакалоне райста.

У 1975 годзе пабудавалі ўласны дом, правялі ўсе камунікацыі. А таму жывуць хоць і ў гарадскіх умовах, але з вясковымі выгодамі: агарод, чыстае паветра, лес побач. У грыбны сезон паспявалі да работы збегаць у лес, набраць баравікоў, а вечарам іх апрацаваць.

І хоць зараз знаходзяцца на пенсіі, спяшацца на работу не трэба, але заняткаў для душы хапае. Даглядаюць агарод. Гаспадыня вельмі любіць кветкі, разводзіць іх, і летам сядзіба ўпрыгожваецца рознакаляровым дываном з руж, лілей ды вяргінь. Чытаюць мастацкую літаратуру. З’яўляюцца пастаяннымі падпісчыкамі раённай газеты.

Гэты год незвычайны для сям’і Аўчыннікавых. У мінулым месяцы муж і жонка адзначылі залатое вяселле. Калі пацяплее, Ніна Аляксандраўна і Пётр Міхайлавіч мараць абвянчацца ў царкве, каб яшчэ больш трывала замацаваць сямейны саюз. 8 сакавіка Ніна Аляксандраўна будзе прымаць віншаванні не толькі з Днём жанчын, але і з нагоды ўласнага 70-годдзя, а адна з дачок сёлета адзначыць 50 гадоў. Дарэчы, дзеці таксама жывуць і працуюць у горадзе, дзе гэту цудоўную працавітую сям’ю добра ведаюць і глыбока паважаюць.