Ветэран Вялікай Айчыннай вайны Эдуард Шышко атрымаў медаль “За адвагу” праз 7 дзесяцігоддзяў пасля здзяйснення гераічнага ўчынку на фронце. Тое стала магчымым дзякуючы настойлівасці і добраму валоданню метадамі работы з архіўнымі базамі дадзеных яго дачкі — Галіны Шышко. Жанчына ўстанавіла, што баявы медаль франтавіку не быў уручаны з-за скажэння імя па бацьку пры афармленні загада аб яго ўзнагароджанні.

Калі выпадковыя прахожыя ўбачылі рыбака, што праваліўся пад тонкі лёд, то не разгубіліся і дзейнічалі найбольш эфектыўным для такога форс-мажору чынам. Яны аператыўна перадалі выратавальнікам дакладна сфармуляваныя звесткі аб крытычнай сітуацыі, і гэта дазволіла ў найкарацейшы тэрмін выцягнуць небараку з ледзяной пасткі.

Хірургі Аляксандр Сільчанка, Давід Сцепанян і Валерый Асадчы правялі першыя ў нашым раёне аперацыі па пратэзіраванні сцегнавых суставаў.

Бізнес-лэдзі Наталля Пахоменка паспрыяла колькаснаму і якаснаму росту асіповіцкай індустрыі адпачынку. Вясной яна адкрыла більярд-бар “Трон”, які працуе па ўзору еўрапейскіх пабаў, аднак мае выразны дызайн старажытнай беларускай карчмы.

Фірменныя вырабы калектыву ААТ “Асіповіцкі хлебазавод” — хлеб “Пажытны з семачкамі” і торт “Веста” — увайшлі ў спіс лепшых прадуктовых тавараў Рэспублікі Беларусь.

Вучань СШ № 1 Антон Рэкіш заняў II месца ў рэспубліканскім конкурсе відэарэжысёраў-аматараў “Незвычайнае кіно”. Зняты ім на відэакамеру мабільнага тэлефона кароткаметражны фільм расказаў пра прыгажосць асіповіцкай прыроды.

Вадзіцелі аўтапарка № 19 Мікалай Шчаковіч і Аляксандр Савіцкі ў складзе групы беларускіх калег былі камандзіраваны ў Сочы і перавозілі пасажыраў падчас ХХII зімовай Алімпіяды.

Ганна Майсееўна Доўгая з вёскі Тарасавічы і Аляксандра Васільеўна Бітус з Жорнаўкі адзначылі 100-гадовы юбілей. А Марыя Iванаўна Шалькевіч з Дубавога — 106 дзень нараджэння. Наша зямлячка стала самым старэйшым жыхаром Магілёўскай вобласці.

Вальшчык Дзмітрый Караткевіч бліскуча пацвердзіў узровень прафесійнага майстэрства, заняўшы першыя месцы адразу ў дзвюх дысцыплінах на чэмпіянаце па валцы лесу, які праходзіў на базе ДДЛГУ “Асіповіцкі доследны лясгас”.

Фермер з Карытнага Iгар Чаропка разводзіць страусаў. Незвычайныя птушкі сталі не толькі адной з адметнасцей вёскі, але і своеасаблівым дапаможнікам па вывучэнні заалогіі: мясцовыя школьнікі падчас экскурсій на яго падворак “ужывую” знаёмяцца з прадстаўнікамі трапічнай фаўны.

Калектыў будаўнічага падраздзялення ДУКВП “Водаканал” здаў у эксплуатацыю малочнатаварную ферму ў СВК “Калгас “Ясень” напярэдадні 7 лістапада і, такім чынам, спрыяў адраджэнню савецкай традыцыі адзначаць свята Кастрычніцкай рэвалюцыі важкімі працоўнымі дасягненнямі.

Машыніст цеплавоза Віктар Турэц за 30 гадоў работы на чыгунцы праехаў 1 мільён кіламетраў без адзінай аварыі. Такім чынам, зямляк па службовых справах здзейсніў амаль 24 падарожжы вакол свету. А вось для Iльі Свердлікава і Таццяны Кузьміной дальнія вандроўкі на матацыкле — захапленне. Прычым настолькі глыбокае, што нават свой шлюб яны вырашылі адзначыць мотападарожжам на Каўказ. Шукальнікі рамантычных прыгод пераадолелі на спартыўна-турыстычным байку “Кавасакі” каля 6 тысяч кіламетраў.

Iмя мастака Апалінарыя Гараўскага, чые работы ўвайшлі ў залаты фонд рускага жывапісу ХIХ стагоддзя, на радзіме стала вядомым толькі ў 2014 годзе. А ён, між іншым, нарадзіўся ў нашай вёсцы Уборак і некаторыя свае работы — напрыклад, вядомую карціну “Вечар у Мінскай губерні” — напісаў у яе наваколлі.