Протаіерэй айцец Васілій БЕЛАВУС правёў абрад Вадохрышча на гарадскім пляжы. Экстрэмальнае купанне было бездакорна арганізавана, таму, нягледзячы на моцны мароз, у ім прыняло ўдзел да 200 чалавек. Па словах святара, узгаданы хрысціянскі абрад будзе наладжаны і ў 2014 годзе ў тым жа месцы.

* * *

Кіраўніцтва сеткі магазінаў “Суседзі” правяло эфектную акцыю па “раскрутцы” сваіх гандлёвых кропак. На працягу чэрвеня-жніўня сярод пакупнікоў было разыграна 10 каштоўных прызоў — зліткаў золата агульнай вагой 50 грамаў.

* * *

Падчас ліквідацыі наступстваў урагана “Хаўер” у адрас дарожных і камунальных службаў было выказана мноства нараканняў за тое, што яны “празмерна марудна” расчышчаюць дарогі, хаця на самой справе людзі і тэхніка працавалі на мяжы фізічнай трываласці. Словы ўдзячнасці прагучалі толькі ад жыхароў вёскі ЗАСЯЛЕЧЧА (Вяззеўскі сельсавет). Самыя агрэсіўныя папрокі не паўплывалі на хуткасць работ, а вось памяць пра маральную падтрымку і добразычлівае разуменне сітуацыі захавалася дагэтуль.

* * *

Таццяна ГУРСКАЯ адзіная ў раёне спартсменка, якая ўсур’ёз займаецца бегам на доўгія дыстанцыі. Амаль кожны дзень яна прабягае па 20-30 кіламетраў, рэгулярна ўдзельнічае ў класічных марафонах і перыядычна адважваецца на звышмарафонскія забегі — на 100 кіламетраў. Упартая заўзятарка займаецца бегам амаль 15 гадоў, але яе прыклад так і не “заразіў” нікога з землякоў. Імунітэт да здаровага ладу жыцця?!

* * *

Вайскоўцы 51 змешанай артылерыйскай групыі 336 рэактыўнай артбрыгады перанеслі скульптуру салдата, вядомую пад уласным імем “Алёша” з былога паўночнага ваеннага гарадка ў паўднёвы. Ён быў дыхтоўна адрэстаўрыраваны, і хоць адна з вулічных скульптур, што некалі ўпрыгожвалі наш горад, не была разбурана і выкінута на сметнік. Памятаеце, як адносна нядаўна скульптурныя кампазіцыі эпохі 50-х надавалі своеасаблівую індывідуальнасць перакрыжаванням вуліц Сумчанкі і Юбілейнай (“Жанчына з боханам”), Сумчанкі і Інтэрнацыянальнай (“Жанчына з дзіцём”), стадыёна “Лакаматыў” (“Савецкі спартсмен”)?

* * *

Таццяна ІВАНОВА стала першым на Асіповіччыне вадзіцелем аўтобуса. Незвычайнае для жанчыны рабочае месца яна заняла ў адпаведнасці з праводзімай банкам развіцця краіны праграмай забеспячэння раёнаў Магілёўшчыны школьнымі аўтобусамі. Абавязковай умовай атрымання транспартнай адзінкі была менавіта наяўнасць жанчыны-шафёра ў рэгіёне.

* * *

Добрую кампанію “аўтаамазонцы” склалі падпалкоўнік міліцыі Андрэй БАБІЧ, у вольны час — заўзяты байкер, і таксіст-імправізатар Мікалай ЗАБАЎСКІ, чыя прафесіянальная “фішка” — размаўляць з кліентамі выключна рыфмаванымі сказамі.