Уладзімір Роўбель, ветэран працы. Ганаровы грамадзянін Асіповіцкага раёна:

— На сваім вяку пабачыў рознае і хачу сказаць, што зараз мы жывём добра: было б толькі жаданне працаваць. Важна берагчы тое, што маем, і прымнажаць яго. На самай справе ў жыцці ўсё проста: каб атрымаць хлеб, трэба яго спачатку пасеяць — а як інакш? Пайду на выбары, каб прагаласаваць за ўмацаванне існуючай стабільнасці. Перажываю за лёс гаспадарак, якім аддаў шмат гадоў працы, за ўвесь раён — тут нарадзіўся і вырас. Веру, што і заўтрашні дзень будзе для ўсіх нас светлым і шчаслівым.

Надзея Брыткевіч, буртаўкладчык Асіповіцкага буракапрыёмнага пункта Слуцкага цукроварафінаднага камбіната:

—   Удзельнічаць у выбарах — добрая магчымасць выказаць свой пункт гледжання. Не раздзяляю пазіцыю тых, хто адмаўляецца ісці на выбарчы ўчастак: маўляў, адзін голас усё роўна нічога не значыць. Якраз з мільёнаў асобных галасоў і складаецца агульны вынік!

Мікалай Гоман, ваенны камісар раёна:

— Iду на выбары, каб у Беларусі і далей быў парадак, мір-спакой, развіццё і рух наперад. Калі жадаем і далей жыць у цыві-лізаванай краіне, то і да свайго грамадзянскага абавязку таксама павінны ставіцца з усёй адказнасцю.

Алена Бізунок, настаўніца Дараганаўскага ВПК дзіцячы сад – сярэдняя школа:

— Пытанне, ісці на выбары ці не, у нашай сям’і ніколі не стаяла: матуля Валянціна Людвігаўна заўсёды была задзейнічана ў падрыхтоўцы да гэтай палітычнай падзеі, уваходзіла ў склад участковых камісій. Для ўсіх нас выбары — дзень асаблівай важнасці, такія адносіны перанесла ўжо і ў сваю сям’ю. Разам з мужам абавязкова прагаласуем за абраных кандыдатаў. Як педагог, лічу, што настаўнікі павінны заўсёды займаць актыўную пазіцыю: хто, калі не мы, навучыць дзяцей адказнасці за сваю будучыню?