Аўтамабіліст? Настаўнік!

Адно з найбольш папулярных месцаў навучання будучых вадзіцеляў — аўташкола ДТСААФ. Існуе яна ўжо 51 год, і на працягу 33 з іх тут працуе сённяшні кіраўнік Аляксандр Ляшэнка — “аўтабацька” шматлікіх асіповіцкіх вадзіцеляў-аматараў і прафесіяналаў.

— За ўвесь час існавання аўташколы падрыхтавалі каля 30 тысяч курсантаў. Зразумела, у розны час іх колькасць вар’іравалася. Напрыклад, пік прыйшоўся на 1987-1990 гады. А вось ў 90-я крызіс не абмінуў, вельмі мала курсантаў было, — успамінае Аляксандр Ільіч. — Галоўная адметнасць нашага часу ў тым, што раней 90% курсантаў былі мужчынскага полу, а зараз усё наадварот. Ёсць і не зусім добрая рыса: менш сталі імкнуцца паўнацэнна атрымаць веды. Але гэта ўласціва ў асноўным самым юным навучэнцам, старэйшыя больш свядома ідуць за “правамі”.

У апошні час рыхтуем каля 120 вадзіцеляў катэгорыі “В” у год, амаль столькі ж — “С”, а яшчэ па паўсотні тых, хто плануе ездзіць на аўтацягніках і газабалонных аўтамабілях. Працэнт здачы з першай спробы на “В” —  60-70%, астатнія — амаль 100%. З гэтага года вучым упраўляць і матацыклам. Разам са мной тэорыю курсантам выкладаюць Аляксандр Дарафейчык і Віталь Іваноў, а практычныя веды даюць Канстанцін Джулай, Аляксей Астравух, Віктар Сцяпанаў, Сяргей Вароніч і Станіслаў Убейконь. Нядаўна абнавіўся і спіс вучэбных аўто: летась набылі “Рэно Логан”, сёлета — “Фальксваген Пола”. Таксама “на варце” два “Дэу”: “Нэксія” і “Маціз”.

Цікава, што калісьці і сам вучыўся менавіта ў на-шай аўташколе — мабыць, гэта лёс. За рулём ажно с 1974 года. Даводзілася ездзіць на розных аўто, але зараз у якасці асабістага аўтамабіля абраў “Хёндай Крэта”.

Напрыканцы верасня Аляксандр Ляшэнка атрымаў Грамату за шматгадовую бездакорную працу і высокі прафесіяналізм ад кіраўніка абласной структуры ДТСААФ Аляксандра Мазура. І гэта — відавочны паказчык таго, як цесна і плённа могуць пераплесціся жыццё і аўтамабілі.

Марыя ТАЛЕЙКА.