Для Юрыя Міхайлавіча Асмалоўскага, заслужанага
трэнера Савецкага Саюза, спорт — гэта жыццё. Вопыту яму не пазычаць: пяць гадоў
працаваў з жаночай зборнай СССР і пятнаццаць — з БССР. Цяпер жыве ў Ялізаве і
ўзначальвае аддзяленне веславання на байдарках і каноэ Магілёўскай абласной
дзіцяча-юнацкай спартыўнай школы прафсаюзаў “Беразіна”.

Ганарыцца трэнер сваімі выхаванцамі і гаворыць,
што пашчасціла трапіць яму ў пасёлак. А яшчэ Юрый Міхайлавіч займаецца і са
свіслацкімі школьнікамі. Кожны дзень ён наведвае суседнюю вёску ўлетку і тры
разы на тыдзень зімой. Асмалоўскі ўпэўнены, што мясцовыя дзеці мацнейшыя за
гарадскіх, бо з маленства дыхаюць чыстым паветрам, працуюць разам са старэйшымі
на зямлі. За адносна нядоўгі час трэніровак ужо два хлопцы і столькі ж
дзяўчынак атрымалі I дарослы разрад па веславанні на байдарках і каноэ. Мае
Юрый Міхайлавіч вялікую надзею на сямікласніцу са Свіслачы, імя якой адкрываць
не хоча.

Многія бацькі разумеюць, як важна прывіць свайму
дзіцяці любоў да якога-небудзь карыснага занятку, развіць яго талент, таму і
прыводзяць сыноў і дачок да Юрыя Міхайлавіча, які заўсёды рады вітаць навічкоў.
Бо спорт для яго — не гульня, а магчымасць паказаць новаму пакаленню шлях да
перамогі.

Адзінае, што замінае ў рабоце — недахоп
спортінвентару. З выратавальных сродкаў — толькі камізэлькі. У яго
распараджэнні чатыры байдаркі, грошы на набыццё якіх выдзеліў Рэспубліканскі
савет прафсаюзаў. Але ў Юрыя Міхайлавіча займаецца сорак хлопчыкаў і дзяўчынак,
а для эфектыўнага навучання ў кожнага павінна быць свая лодка. На жаль гэта
недасягальная раскоша па Ялізаўскіх мерках, бо каштуе адзін такі спартыўны
снарад звыш трох мільёнаў рублёў. Ды толькі нельга забывацца, што Ялізава —
малая радзіма славутых братоў Аляксандра і Віктара Багдановічаў — заслужаных
майстроў спорту Рэспублікі Беларусь, Ганаровых грамадзян Магілёўскай вобласці і
Асіповіцкага раёна, чэмпіёнаў па веславанні на каноэ Пекін-скай Алімпіяды-2008.
Усё ж у ім павінна быць добра абсталяваная спартыўная школа.