Як і кожнае дзіця, яна пачала маляваць з першых
гадоў жыцця. Але калі для многіх дзяўчынак з цягам часу пэндзаль губляе
чароўнае прыцягненне, то наша гераіня палюбіла гэты занятак яшчэ больш. Пры
выбары прафесіі адназначна вырашыла звязаць свой лёс з творчасцю, стала
настаўніцай малявання і чарчэння. І цяпер карытнянскія школьнікі з
задавальненнем наведваюць не толькі ўрокі малявання, але і гурток выяўленчага
мастацтва “Натхненне”, які арганізавала Дар’я Васільеўна Кузняцова.

Любімы выяўленчы сродак  мастачкі — алей, але выкарыстоўвае і
акварэль, алоўкі. Школьнікі малююць пэндзлем, адбіткам, пальцамі — у залежнасці
ад настрою і задумы. Кіраўнік лічыць, што дзеці маюць права на ўласную ідэю,
падбор сродкаў і прыёмаў, і на занятку паведамляе толькі тэму, якую кожны можа
раскрыць па-свойму. Старшакласнікі вучацца рабіць падрамнікі, рыхтаваць палатно
да работы на ім. А яшчэ Дар’і вельмі падабаецца распісваць сцены. Гэтым яна
займаецца дома (напрыклад, заходзячы на кухню, трапляеш… у Венецыю), у
кватэрах сяброў, а цяпер — і ў школе. Вучні старшых класаў дапамагаюць — і ім
падабаецца. Цяпер карыдоры ўстановы адукацыі радуюць вока выявамі архітэктурных
збудаванняў розных стыляў, знаёмяць з гісторыяй краіны.

Адна з вучаніц з паэтычным імем Джульета
настолькі захапілася маляваннем архітэктурных збудаванняў, што паступіла ў
архітэктурны каледж.

Парадавала вестка, што  Дар’я Васільеўна нядаўна прызначана завучам
школы. Вельмі добра, калі кіраўнікамі становяцца творчыя, крэатыўныя людзі,
якія глыбока могуць пранікнуць у сутнасць любога пытання.

Дарэчы, у яе падрастае сынок Данілка, які ў
маміны карціны ўжо ўстаўляе ўласныя мазкі. Хто ведае, можа расце будучы мастак?
Пабла Пікасо таксама пачынаў з таго, што дамалёўваў на палотнах бацькі лапкі
галубоў…

Іна Заскевіч.