Нашы партнёры

Калі на лёсе — паштовы штэмпель

Менавіта з гэтым прадпрыемствам звязана ўсё працоўнае жыццё начальніка галоўнай касы Асіповіцкага райвузла паштовай сувязі Алены Старковай, а яе агульны паштовы стаж і ўвогуле налічвае ўжо 34 гады.

 Трапіла яна некалі ў прафесію, можна сказаць, выпадкова, каб праз дзесяцігоддзі пераканацца, што на пошце якраз-такі выпадковых людзей не бывае, а калі стаў працаўніком гэтай сферы, то наўрад ці яна цябе адпусціць. Старкову без перабольшвання можна назваць майстрам сваёй справы, бо за гады работы давялося асвоіць розныя пасады: аператара  ўчастка сарціроўкі і абмену пошты і аператара паштовай сувязі, начальніка ўчастка абмену, начальніка аддзялення сувязі. Словам, ведае сферу “ўздоўж і ўпоперак”. Тут дапамагла не толькі практыка, але і вучоба ў каледжы паштовай сувязі.

Сённяшнія задачы кампаніі — развіццё электроннага гандлю, дыстанцыйных сэрвісаў, удасканаленне паштова-лагістычнай інфраструктуры, цыфравізацыя ўпраўленчых і вытворчых працэсаў, канечне, гучаць вельмі сучасна, аднак, як лічыць наша зямлячка, нават час не змяніў такіх патрабаванняў, як знаходжанне ўзаемаразумення з людзьмі ды адказныя адносіны да працы.

Адна з функцый, якія выконвае гэты спецыяліст, — забеспячэнне аддзяленняў сувязі раёна паштовай прадукцыяй: канвертамі, паштоўкамі, маркамі ды інш. Яна дакладна ведае, калі якому аддзяленню трэба папаўняць запас, уважліва адсочвае, каб выконваўся абавязковы асартымент. Плюс курыруе, як і іншыя калегі з райвузла, работу сельскіх АПС, а яе кропкі — у Дрычыне, Вяззі і Ліпені.

Наклала прафесія адбітак і на свет асабістых захапленняў Алены Віктараўны, сярод якіх калекцыяніраванне адкрытак. “Калі трымаеш у руках 100-гадовую паштоўку, адчуваеш рознае: захапленне дызайнам і акуратнасцю паліграфіі, хваляванне ад таго, што рэч ужо пражыла ўдвая даўжэйшы век, чым ты, і светлую настальгію па эпосе, калі такія адпраўленні былі звычайнай справай, пажаданні пісаліся ад рукі, а таму ўтрымлівалі больш цяпла і шчырасці”. Можа, таму і дастаўляе асаблівае задавальненне, калі ўзрастае перад святамі продаж паштовак?