Жыхары Асіповіцкага раёна на французскай сцэне

Народны ансамбль народнай песні «Сузор’е» актыўна займаецца канцэртнай дзейнасцю не толькі ў раёне, але і далёка за яго межамі. Не так даўно калектыў пабываў у Францыі, дзе праходзілі Дні беларускай культуры. Самадзейныя артысты далі 5 дабрачынных канцэртаў з працягласцю кожнага па 2 гадзіны. Сцэнічнымі пляцоўкамі сталі гарадскія кірмашы, школы — творчасць «сузор’еўцаў» змаглі ацаніць каля трох тысяч французаў.

На адным з канцэртаў прысутнічаў пасол Беларусі ў Францыі Павел Латушка, які выказаў у адрас землякоў словы падзякі за карпатлівую працу на ніве адраджэння беларускай народнай песенна-танцавальнай спадчыны. Мясцовая прэса прысвяціла артыстам некалькі артыкулаў, а мэр адной з акруг перадаў невялікія сувеніры. Як толькі ансамбль вярнуўся дахаты, адразу ж пабываў у спецшколе-інтэрнаце — выступіў з канцэртам і перадаў дзецям падарункі з далёкай Францыі.