Хутка праляцеў Масленічны тыдзень, а завяршыўся ён для асіпаўчан відовішчным вясёлым святам, якое адбылося на пляцоўцы каля раённага Цэнтра культуры і адпачынку

Творчыя калектывы і рамеснікі падрыхтавалі выставу, на якой прадставілі плеценыя кашы, вязаныя лялькі, вырабы з ільну, скуры, гліны і іншых матэрыялаў. Была аформлена тэматычная падборка літаратуры пра народныя традыцыі і святы. Побач прапаноўваліся смачныя бліны, аладкі, пірагі, пернікі, пячэнне — словам, пачастункі на любы густ. Жадаючым заварвалі гарачы чай, хаця замёрзнуць не паспяваў ніхто: актыўныя вядучыя, вясёлыя скамарохі і паважная Масленіца арганізавалі разнастайныя забавы. Дзеці і дарослыя гулялі ў ручаёк, бегалі навыперадкі ў мяхах, потым з блінамі на галаве, кідалі валёнкі — у каго далей заляціць, адгадвалі загадкі, атрымлівалі адрасныя пажаданні, танцавалі і вадзілі карагоды. Іграла музыка, а творчыя калектывы ўстаноў культуры Асіповіччыны “Дзівакі”, “Люлечка” і “Сваякі” радавалі землякоў душэўнымі песнямі.

І хоць прырода ў гэты дзень не зазірнула ў каляндар, у якім ужо значылася вясна, а вырашыла прыпаднесці сюрпрыз у выглядзе снегу, аднак юныя ўдзельнікі свята не разгубіліся і скарысталі гэту нечаканасць надвор’я найлепшым чынам: яны кінуліся ляпіць розныя фігуркі, абсыпацца снегам, які сёлета радаваў нячаста, і атрымлі-валі ад такога занятку толькі станоўчыя эмоцыі.

Яркім акордам завяршэння свята стала спальванне пудзіла Масленіцы. Гэты абрад здаўна лічыўся момантам ачышчэння агнём ад усяго непрыемнага, нядобрага, так развітваліся з зімой і сустракалі вясну.

Вось і ўдзельнікі свята, паглядаючы на вогнішча, закружылі ў развітальным карагодзе. Вясне дарогу!