Меркаванне

Свята тых, хто дорыць свята

Кацярына ІВАНОВА.

e.ivanova@gzt-akray.by

Напярэдадні Дня работнікаў культуры ў ГЦК “Равеснік” адбылося ўшанаванне лепшых прадстаўнікоў прафесіі, дзе ім уручылі ганаровыя граматы і падзячныя лісты. Аб сваёй працы «АК» расказалі некаторыя ўдзельнікі мерапрыемства.

Ірына Раманчук, загадчык сектара культуры райвыканкама:

— Функцыі ўстаноў культуры розныя: пазнавальна-інфарматыўная, забаўляльная, развіваючая. Кожная з устаноў выконвае свае задачы. Бібліятэкі, школы мастацтваў, клубы і дамы культуры, музей і цэнтр народных рамёстваў — усе працуюць з насельніцтвам. Кожны ўносіць часцінку сваёй працы і ўласнай душы для таго, каб парадаваць землякоў, узбагаціць новай інфармацыяй і даць тэму для роздуму, пазбавіць ад суму і расквеціць жыццё яркімі эмоцыямі.

Віншую ўсіх калег з прафесійным святам, жадаю далейшых творчых поспехаў, моцнага зда-роўя і сямейнага дабрабыту.

Алена Стрэльская, бібліятэкар Верайцоўскай бібліятэкі:

— Задаволена, што нашы чытачы не мяняюць звычак і працягваюць наведваць бібліятэку. Прыходзяць дарослыя, школьнікі і пенсіянеры. Сёлета фонды крыху папоўніліся мастацкай літаратурай, а гэта значыць, парадуем чытачоў новымі займальнымі сюжэтамі. Запомнілася цікавае свята, прымеркаванае да Дня моладзі, якое мы правялі сумесна з клубам у Дражні. Будзем старацца і далей арганізоўваць разнастайныя мерапрыемствы.

Вікторыя Чаур, харэограф дзіцячай школы мастацтваў № 1:

— Цудоўна, што маем магчымасць займацца з вучнямі не дыстанцыйна, а ў класе. А заняткі танцамі вельмі прывабліваюць сучасных дзяцей, рабяты ахвотна асвойваюць як класічныя, так і сучасныя, а таксама народныя танцы. Нядаўна мы сталі супрацоўнічаць з ваенным, а таксама цымбальным аркестрамі, што дазваляе ставіць цікавыя нумары і развівацца ў розных напрамках.

Антаніна Сцяпанава, дырэктар раённага гісторыка-краязнаўчага музея:

Вельмі люблю сваю справу, мабыць, за тое, што ў музея ёсць свая душа, крэатыўнасць, непаўторнасць. Радуе наяўнасць ва ўстановы вялікай колькасці надзейных сяброў, бо без іх мы не змаглі б ажыццяўляць усе тыя праекты, якія разам нам па плячы. Кожны год праводзіцца шмат цікавага. Стараемся рэгулярна абнаўляць праграму. З тых, што праходзілі сёлета, хацелася б адзначыць традыцыйныя Магдаленаўскія чытанні, якія прайшлі ў фармаце экскурсіі па месцах, звязаных з гэтай вы-бітнай асобай. Прыемна, што са сваімі сябрамі маем магчымасць пазнаваць Беларусь шляхам наведвання розных яе куткоў, і ў кожным знаходзім штосьці цікавае і непаўторнае.