Гэта свята адзначаюць артысты, рэжысёры, сцэнарысты, касцюмеры, гукааператары, людзі іншых творчых прафесій, а таксама тыя, хто ахвотна наведвае тэатральныя спектаклі.

А самае лепшае святкаванне — гэта прэм’ера новай пастаноўкі. Такая адбылася ў суботу на сцэне раённага Цэнтра культуры і вольнага часу. Народны тэатр “Надзея” прадставіў увазе гледачоў спектакль “У чаканні Яго” па п’есе драматурга Міхаіла Хейфеца. Рэжысёр-пастаноўшчык Наталля Астрашэўская,  мастак Анастасія Брыка і харэограф Юлія Сакалоўская пастараліся зрабіць спектакль цікавым для ўсіх.

Гэта тыповая камедыя становішчаў, калі чатыры жанчыны розных сацыяльных груп сустрэліся ў гарадскім парку, прыйшоўшы на спатканне з таямнічым мужчынам, з якім кожная пазнаёмілася ў сацыяльных сетках. Аказалася, што сюды іх запрасіў адзін і той жа чалавек. Але жанчыны не разгубіліся. Замест таго, каб паскардзіцца і сумаваць, яны весела правялі час і здабылі важны жыццёвы ўрок.

Самадзейныя артысткі Інеса Кужым, Вольга Бусел, Таццяна Барадзіна і Таццяна Жашкова цудоўна справіліся са сваімі ролямі і падарылі гледачам станоўчыя эмоцыі.