У Асіповіцкім гісторыка-краязнаўчым музеі адкрылася выстава “Слуцкія паясы”

Яны — адна з нацыянальных рэліквій беларусаў, цудоўны ўзор дэкаратыўна-прыкладнога мастацтва, які стаў не толькі гістарычным культурным сімвалам, але і сучасным брэндам нашай краіны.

Надзвычай прыгожы, сімвалічны і дарагі прадмет мужчынскага гардэроба, даступны толькі выхадцам з вышэйшых саслоўяў, ткалі ў Беларусі яшчэ ў XVIII стагоддзі. З паясамі звязаны дзіўныя падзеі і сямейныя таямніцы, загадкавыя і часам містычныя гісторыі.

— Сёння старадаўнія слуцкія паясы — рарытэт, — гаворыць дырэктар установы культуры Антаніна Сцяпанава. — У краіне захоўваюцца адзінкавыя экзэмпляры і фрагменты, а большая частка твораў нацыянальнага мастацтва знаходзіцца ў музейных і прыватных калекцыях свету. Тым не менш адроджаны ўнікальныя традыцыі іх вырабу. Сучасныя майстры робяць дакладныя копіі, аналагі і мастацкія стылізацыі, якія могуць стаць эксклюзіўным сувенірам. У землякоў ёсць выдатная магчымасць ўбачыць 4 паясы. Яны сатканы з захаваннем усіх арыгінальных традыцый і выкарыстаннем натуральнага шоўку, нітак з утрыманнем золота, серабра. Выстава будзе працаваць да Новага года.

Ніна ВІКТОРЧЫК

n.viktorchik@gzt-akray.by