Культура

Разам з песняй

Не так даўно ў пасёлку Глуша прайшоў XI раённы фестываль народнай творчасці і рамёстваў. Сёлета сюды прыехалі паспаборнічаць госці з сямі раёнаў Магілёўшчыны, у тым ліку і з Асіповіччыны.

— Для нас гэта быў шосты фестываль, — расказвае ўдзельніца народнага ансамбля народнай песні “Сваякі” Карытнянскага сельскага Дома культуры Аксана Муха. — Мелі раней дыпломы першай і другой ступені ў розных намінацыях. Зараз у рэгі-янальным конкурсе беларускай песні “Люблю цябе, Белая Русь!” занялі трэцяе месца. Выконвалі народныя песні “За нас, беларусаў” і “Гармонік грае”. Палічылі, што яны добра падыходзілі па тэматыцы конкурсу. I не памыліліся. Слухачам, якіх было значна больш, чым раней, нашы спевы вельмі спадабаліся. Штогод мы прыязджаем сюды не толькі спаборнічаць, але і атрымаць масу станоўчых эмоцый, сустрэцца з аднадумцамі. Сёлета тут выступала больш за 10 калектываў.

Зараз у ансамблі 15 чалавек рознага ўзросту, аб’яднаных любоўю да беларускай народнай песні. У жніўні кіраўніком стала малады спецыяліст Кацярына Рудзінская. Дзяўчына мясцовая і вядомая народнаму ансамблю, бо і раней заўсёды ўдзельнічала ў розных культурных мерапрыемствах раёна. Таму ў калектыве яна была ўжо амаль што роднай. Напэўна спевакоў чакае яшчэ шмат узнагарод. Няхай жа заўсёды льецца беларуская песня і трапляе кожнаму ў сэрца, бо няма нічога больш патрэбнага, чым захаваць роднае ў народзе!