Культура

“Сузор’е” трымае марку

Днямі падведзены вынікі ХХХ Міжнароднага фестывалю мастацтваў “Славянскі базар у Віцебску”

Па афіцыйнай інфармацыі, на фестывалі было акрэдытавана больш за 5,3 тысячы гасцей і ўдзельнікаў з 32 краін. На 25 пляцоўках адбылося 150 падзей, гледачамі якіх стала больш за 73 тысячы чалавек. У адным з праектаў — VIII адкрытым турніры нацыянальных танцаў “Танчым разам” — выступалі ўдзельнікі народнага ансамбля народнай песні і музыкі “Сузор’е” (Пратасевіцкі СДК).

Умовы спаборніцтва: пары ці танцоры-салісты павінны былі выканаць па 10 беларускіх народных танцаў. Прычым, што істотна, ацэньвалася не проста дакладнасць рухаў, а адпаведнасць іх канкрэтным рэгіянальным традыцыям.

За тры дзесяцігоддзі існавання “Сузор’е” захавала звыш 90 народных танцаў у характэрнай для заходняй часткі Беларусі выканаўчай манеры. Такога запасу хапіла, каб прадставіць 5 танцавальных пар у розных узроставых катэгорыях, прычым кожная з іх дэманстравала сваё майстэрства ў розных “танцавальных наборах”. Канкурэнцыя была традыцыйна жорсткая, так што Дзiяна Шэйко і Аляксандр Валанковiч, Вера Гладкая і Iлля Фейзер, Алена Мiшур і Трафiм Шаплыка, Вiкторыя Шарамет і Уладзiслаў Еўдакiмовiч да прызёрскага ўзроўню не дабралі лічаных балаў і атрымалі дыпломы ўдзельнікаў. Затое пара Наталлі і Аляксандра Еўдакімовічаў паказала клас: узяла Гран-пры — галоўную конкурсную ўзнагароду.

Па меркаванні журы, у склад якога ўвайшлі самыя буйныя спецыялісты ў галіне айчыннай танцавальнай культуры, асіповіц-кія выканаўцы дасягнулі максімальна магчымай дасканаласці. Прынамсі, танцавалі яны чатыры варыянты полькі, “Барыню”, “Какетку”, “Каханачку”, “Суботу”, “Карапэт”, “Ойру” .

У мінулым годзе, калі ўдзельнікі “Сузор’я” дэбютавалі ва ўзгаданым конкурсе, яны таксама выступілі ўпэўнена і атрымалі адразу некалькі ўзнагарод. Вышэйшай з якіх — Дыпломам I ступені ў сваёй узроставай катэгорыі — былі адзначаны Вiкторыя Шарамет і Уладзiслаў Еўдакiмовiч.

Па словах Наталлі Еўдакімовіч, адпачываць пасля фізічна вымотваючага і маральна напружанага танцавальнага марафону ў Віцебску калектыву няма калі. Адразу пасля вяртання дадому пачалася інтэнсіўная падрыхтоўка да Рэспубліканскага конкурсу аўтэнтычнага фальклору “Берагiня”, якi адбудзецца 24 ліпеня ў гарадскім пасёлку Акцябрскi Гомельскай вобласцi.

Артысты рэпеціруюць практычна штодзень па тры-чатыры гадзіны. Калі ўлічыць, што для большасці ўдзельнікаў калектыву народныя танцы і спевы — гэта ўсяго толькі захапленне, якім яны могуць займацца выключна ў вольны час, такі сур’ёзны падыход выклікае шчырую павагу. І нават некаторую зайздрасць, бо “Сузор’е” — гэта дружная суполка тых, якія могуць…