Майстрыхі Асіповіччыны Ірына Забаўская і Кацярына Пацкевіч удзельнічаюць у рэспубліканскім праекце “Культурная спадчына Беларусі”.

Асноўная яго ідэя — стварэнне карт кожнай вобласці, якія будуць сабраны ў адзіную карту Беларусі памерам 3х2,5 метра. Кожны раён прадаставіць вышытыя сімвалы сваёй матэрыяльнай і духоўнай спадчыны. Асіповіччына пакажа аўтэнтычны мясцовы арнамент.

— Увесь працэс вышывання здымае прадстаўнік Магілёўскага абласнога метадычнага цэнтра народнай творчасці і культурна-асветніцкай работы, — расказвае Ірына Забаўская. — Пасля з сабраных фота і відэаматэрыялу будзе створаны фільм.

Прэзентацыя праекта адбудзецца напярэдадні Дня Незалежнасці. Створаная карта-габелен стане сапраўдным сімвалам культурнай спадчыны беларускага народа.