Кожны, хто сочыць за творчым жыццём раёна, безумоўна, ведае зладжаную работу калтекываў Вязаўніцкага Дома культуры

Без іх удзелу не абыходзіцца ні адно больш-менш значнае свята, правядзенне ўрачыстых цырымоній. Напярэдадні Дня работнікаў культуры папрасілі загадчыка Жанну Ліхадзіеўскую расказаць пра ўстанову штосьці самае адметнае.

Самая доўгая гісторыя існавання ў народнага ансамбля народнай песні “Чыстыя крыніцы”, які працуе пры Вязаўніцкім СДК. У наступным годзе ён адсвяткуе 50-гадовы юбілей.

Самы малодшы ўдзельнік аб’яднанняў — пяцігадовая Ганна Матусевіч. Дзяўчынка наведвае заняткі вакальнага  гуртка “Усмешка”.

Самая старэйшая — удзельніца “Чыстых крыніц” Галіна Мікалаеўна Чалава 1952 года нараджэння.

Самая вялікая колькасць мерапрыемстваў выпадае на снежань, студзень, сакавік і чэрвень.

Самая значная ўзнагарода — Дыплом лаўрэата І ступені на Першым адкрытым музычным форуме гарманістаў Беларусі, які атрымаў акампаніятар “Чыстых крыніц” Сцяпан Саханчук.

— Прыемна ўсведамляць, што лепшы гарманіст Беларусі — наш, — адзначае Жанна Уладзіміраўна.

Самы новы музычны інструмент — балалайка. За яе асваенне, не маючы музычнай адукацыі, узяўся кіраўнік “Чыстых крыніц” Алег Матусевіч. І ў яго атрымалася!

Самае незвычайнае выступленне адбылося ў вёсцы Рафалін.

— Мы прыехалі туды з канцэртам, прысвечаным Жню жанчын, — расказвае загадчык. — Падчас выступлення бабулі, якія сядзелі на канапе, прытупвалі нагамі і падпявалі. Раптам Алена Антонаўна Сафонава пайшла ў скокі. За ёй — гаспадыня дома Ганна Францаўна Чаропка і Зінаіда Міхайлаўна Вернікоўская, Яніна Карлаўна Астаповіч, Кацярына Ціханаўна Жук. Здавалася, гэты маленькі домік не вытрымае такога запалу, з якім танчылі гэтыя маладжавыя бабулькі. Потым доўга нас праводзілі, частавалі і дзякавалі. Гэтага ніколі не забыцца. На жаль, сёння ў жывых засталіся толькі Кацярына Жук і Зінаіда Вернікоўская…

Самыя папулярныя мерапрыемствы, якія праводзяцца ў СДК, — Каляды, Масленіца, Купалле і Зажынкі.

Самую далёкую паездку здзейсніў ансамбль “Чыстыя крыніцы”. У 1997 годзе калектыў  удзельнічаў у Міжнародным  фестывалі народнай творчасці ў Рэспубліцы Малдова.

— Кожная паездка, блізкая ці далёкая, па-свойму незабыўная, таму што побач надзейная каманда, прафесіяналы справы і проста добрыя людзі, — лічыць Жанна Ліхадзіеўская. — Дарэчы, заўтра мы з “Чыстымі крыніцамі” адправімся ў Хоцімск на абласныя “Дажынкі”. Мне яшчэ адведзена роля Восені-багатухі, якая сустракае на падворку “Асіповіччына рэгіянальная” ганаровую дэлегацыю. Вельмі хвалююча, але думаю, справімся.