Рамёствы

Вылепіць сябе новага

Лепка як сродак арт-тэрапіі

Інклюзіўная студыя керамікі “Коловрат”, створаная ў самым пачатку года на базе раённага цэнтра народных рамёстваў і дэкаратыўна-прыкладнога мастацтва ў рамках рэалізацыі мясцовай ініцыятывы праекта міжнароднай дапамогі, набывае ўсё большую папулярнасць сярод насельніцтва Асіповіччыны і нават іншых рэгіёнаў.

Кіраўнік студыі Вераніка Шынкарова расказвае, што па суботах да іх прыязджаюць бабруйчане і нават сталічныя жыхары, каб паспрабаваць сябе ў адным з самых старажытных відаў мастацтва.

За месяц у студыі разыходзіцца 50-80 кілаграмаў гліны, яна ператвараецца ў сапраўдныя шэдэўры, у чым можна пераканацца, наведаўшы выставу работ. У студыю прымаюць усіх, незалежна ад узросту, роду дзейнасці, здольнасцей і стану здароўя. Гэта адна з тых устаноў горада, дзе людзі з абмежаванымі магчымасцямі адчуваюць сябе роўнымі з іншымі, паважанымі, патрэбнымі, дастойнымі пахвалы. Тут усе яны майстры, якія могуць па сваёй уласнай праграме ствараць цудоўныя творы. Таму заняткі ў студыі наведвае вялікая колькасць “асаблівых” людзей.

Вось, напрыклад, што піша адна з пастаянных наведвальніц Юлія Калашнікава на сваёй старонцы ў сацыяльнай сетцы: “Мой падсвечнік прынёс мне поспех. У мяне ІІІ месца…”; “Вялікі дзякуй маім педагогам, якія навучылі тварыць усю гэту прыгажосць!”; “Любая мэта дасягальная, галоўнае — не таптацца на месцы”. А магчымасць паверыць ва ўласныя сілы дорага каштуе! Актыўныя ўдзельнікі студыі Сяргей Паўловіч, Максім Цвірко, Наталля Мошчына. Дарэчы, Наталля аформіла індывідуальнае прадпрымальніцтва і спрабуе сябе ў якасці рамесніка.

У студыю керамікі ідуць цэлымі сем’ямі, як, напрыклад, Марына Бурая і яе трое дзяцей. Матулі і бабулі, якія прыводзяць малых, не могуць сядзець і чакаць — яны таксама ўключаюцца ў агульную дзейнасць. Меншыя брацікі і сястрычкі, што прыйшлі за кампанію, пачынаюць катаць шарыкі, якія неўпрыкмет ператвараюцца ў Калабка ці пацерку, птушачку або яблык. Відаць, гліна валодае нейкай чароўнай прыцягальнай сілай.

Разам з Веранікай Вітальеўнай у студыі працуе Леанід Астрэйка, шлях у прафесію якога пачынаўся ў Ліпенскай школе з захаплення лепкай з пластыліну. А зараз да педагога імкнуцца дзеці розных узростаў, асабліва хлопчыкі, разам з якімі Леанід вырабляе герояў мультфільмаў, коміксаў і фантастычных фільмаў. Да работы майстар і яго выхаванцы падыходзяць грунтоўна, дэталёва вылепліваючы зброю, маскі, шлемы і іншыя дробязі, што адрозніваюць насамрэч высакакласныя вырабы. А дзяўчынкам і жанчынам больш даспадобы розныя пано, упрыгажэнні, падвескі, званочкі, вазачкі і талеркі. Дарэчы, посуд лепіцца на ганчарным крузе і больш за іншыя вырабы патрабуе вопыту і спрыту. Таму атрымоўваецца не адразу і не ва ўсіх. Але ніхто нікога і не падганяе, кожны вучань мае ўласныя тэмпы навучання. Тое ж датычыць і тэмы заняткаў. Прыкладны кірунак наведвальнікам прапаноўваюць, але можна і не згадзіцца, а выбраць тое, што адпавядае стану душы ці сённяшняму настрою.

У студыі ёсць і тыя, хто праявіў выбітныя здольнасці. Гэта Ангеліна Долава, Усевалад Маісееў, Юлія Калашнікава, Маргарыта Надтачэева, Дар’я Хмялёва. У агульнай скарбонцы юных і дарослых керамістаў ужо не адна грамата і дыплом, у тым ліку Міжнароднага конкурсу творчасці “Млечны шлях”, Х міжнароднага дзіцяча-юнацкага конкурсу выяўленчага мастацтва “КрасаWEEK”. Не прыехалі без узнагароды і з Дня беларускага пісьменства, які адбыўся ў мінулым месяцы ў Бялынічах: занялі ганаровае другое месца. Зараз асіповіцкія ганчары рыхтуюць выставу вырабаў да абласных “Дажынак”. Але галоўнае дасягненне — не медалі ды дыпломы, а добры настрой усіх, хто займаецца такой цікавай справай.