Асіповічы: навіны культуры
Народны ансамбль “Вязанка” рыхтуецца да ўдзелу ў свяце беларускай традыцыйнай культуры “Зялёныя святкі”, якое пройдзе 8 чэрвеня ў Чавусах. Калектыў працуе над фальклорнай праграмай, куды ўвойдуць карагод, песня і гульня, якія раней нашы продкі выконвалі на Сёмуху. Самадзейныя артысты праводзяць і этнаграфічныя экспедыцыі па мясцовасці, каб аднавіць абрад кумавання і таксама прадставіць яго на суд журы і гледачоў.
Асіповіцкая бібліятэчная сетка вядзе актыўную работу да 70-годдзя вызвалення Беларусі ад нямецка-фашысцкіх захопнікаў. У бібліятэках ужо правялі мерапрыемствы, прысвечаныя гэтай даце. Сярод іх — сустрэчы з людзьмі, на долю якіх выпала ваеннае дзяцінства, акцыя “Прачытаная кніга пра вайну”, гадзіны мужнасці, тэматычныя кніжныя выставы. Прайшло выязное мерапрыемства з удзелам вучняў кадзецкіх класаў СШ № 152 Мінска ў Верайцах, дзе пахаваны Герой Савецкага Саюза М.Абросімаў.
Дзіцячыя школы мастацтваў праводзяць гадавыя справаздачныя канцэрты, падчас якіх навучэнцы паказваюць, чаго ўдалося дасягнуць за 9 месяцаў навучання. Падчас святочнай праграмы праходзіць і цырымонія ўручэння пасведчанняў аб сканчэнні музычнай школы. Iх сёлета атрымае 181 чалавек.
