Маленькія дзеці ў прыгожых і трошкі смешных касцюмчыках выходзяць на сцэну пад вясёлую сучасную музыку, і сэрцы бацькоў, якія сядзяць у глядзельнай зале, заміраюць ад замілавання і гонару. Пастаўшчыком гэткіх прыемных пачуццяў для дзясяткаў мам і тат стала кіраўнік ансамбля Яўгенія Строк.

— Калектывам кірую з 2014 года, і за гэты час зроблена многае, — расказвае Яўгенія Валер’еўна. — Склад ансамбля быў цалкам зменены. Зараз яго аснова — дзяўчынкі і хлопчыкі ва ўзросце ад сямі да чатырнаццаці гадоў, таксама з’явілася дзве падрыхтоўчыя групы. Змяніўся і падыход да падбору рэпертуару. Ён выбіраецца з  улікам узросту і псіхала–гічных асаблівасцей калектыву, па меры росту выканальніцкага майстэрства ўдзельнікаў пастаянна абнаўляецца. На працягу творчага шляху ансамбль заўсёды заняты на мерапрыемствах раённага Цэнтра культуры і вольнага часу, удзельнічае амаль ва ўсіх раённых святах–фэстах, якія праводзяцца на Асіповіччыне. Сярод іх раённыя фестываль народнай творчасці “Веснавыя колеры“, агляд–конкурс дзіцячых і маладзёжных творчых калектываў і выканаўцаў “Хваля” збірае сяброў“. Неаднаразова калектыў станавіўся дыпламантам рэспубліканскага конкурсу харэаграфічнага мастацтва “Я танцую“. Адным са знакавых мерапрыемстваў стаў адкрыты конкурс харэаграфічнага мастацтва “Stars of planet”, які сёлета праводзіўся ў нашым горадзе другі раз, дзе юныя таленты атрымалі тры Дыпломы I ступені і адзін — II ступені.

Кожны, хто хоць раз бачыў выступленне “асарцінак”, упэўнена можа сказаць, што любая харэаграфічная пастаноўка ў выкананні калектыву мае сваю непаўторную харызму і індывідуальнасць. Не можа не здзіўляць творчая фантазія кіраўніка, які ўмее стварыць для танцораў маленькія шэдэўры, здольныя абудзіць у гледачоў масу эмоцый. У чарговы раз гэта пацвердзіў і вялікі канцэрт з нагоды святочнай даты.

У мерапрыемстве роля знайшлася кожнаму з больш чым ста рознаўзроставых удзельнікаў “Асарці”, — дзеліцца харэограф. — Мы імкнуліся паказаць усе напрацоўкі, таму ў праграму ўвайшлі народныя і народна-стылізаваныя танцы, кампазіцыі эстраднай, сучаснай і дзіцячай харэаграфіі. Асабліва парадавала тое, што паглядзець на выступленні маленькіх і не вельмі зорачак прыйшлі не толькі іх родныя, педагогі і сябры, а і іншыя жыхары горада. Наперадзе нас чакаюць новыя дасягненні, і 25 гадоў — гэта толькі пачатак!