Будуць спяваць!

У мінулую пятніцу ў Ялізаўскім пасялковым Доме культуры святкаваў 40-годдзе з дня ўтварэння мясцовы народны ансамбль народнай песні “Вечарынка”. Мерапрыемства сабрала ва ўтульнай зале не адну сотню гледачоў, якія прыйшлі павіншаваць любімы калектыў, у тым ліку прадстаўнікі раённай і мясцовай улады, ЗАТ “Шклозавод Ялізава”, музычнай школы. Гаспадары ўрачыстасці дарылі ўсім прысутным сваю творчасць, сатканую з разнастайных песень, што ўваходзяць у сённяшні рэпертуар, а таксама тых, якія выконваліся першымі ўдзельнікамі ансамбля.

Прыемна, што, нягледзячы на сталы ўзрост, некаторыя з самадзейных артыстак фальклорнага ансамбля “Вячоркі” — менавіта з такой назвай выйшлі на сцэну ў 1974 годзе — знаходзіліся сярод ганаровых гасцей і актыўна падпявалі знаёмыя песні. Вядучыя ўспомнілі добрымі словамі і першага кіраўніка ансамбля, загадчыцу клуба шклозавода “Кастрычнік” Галіну Заварзіну, і баяніста Мікалая Баразну. Роўна 35 гадоў працягвае традыцыі распачатай папярэднікамі песеннай справы і выводзіць калектыў на новы ўзровень цяперашні мастацкі кіраўнік Джэма Рабава.

Амаль 20 гадоў таму калектыў атрымаў званне “народнага” і новы статус — народны ансамбль народнай песні “Вечарынка”. Увесь гэты час — у пастаянным пошуку, рэпетыцыях, выступленнях, аглядах-конкурсах, фестывалях. Як вынік, заслужаныя ўзнагароды і падзякі шматлікіх прыхільнікаў, для якіх у выкананні любімых артыстаў у будучым прагучыць яшчэ не адна песня.

Ніна ВІКТОРЧЫК.