Кожны год у апошні вясновы месяц у музеях па ўсім свеце праходзіць акцыя “Ноч музеяў”. Наш раённы гісторыка-краязнаўчы музей штогод прымае ў ёй актыўны ўдзел. Сёлета вечар 16 мая ператварыўся ў займальнае падарожжа па таямніцах роднага краю.

Супрацоўнікі ўстановы падрыхтавалі для наведвальнікаў квэст “Асіповічы — горад са знакам якасці”. Ён складаўся з 14 унікальных лакацый, кожная з якіх пагружала ў гісторыю і культуру Асіповіччыны. Дзеці і дарослыя з цікавасцю шукалі ўзоры на старадаўніх ручніках і посцілках, разгадвалі крыжаванкі і правяралі назіральнасць, супастаўляючы славутасці райцэнтра з іх месцазнаходжаннем.

Практычная частка дадала яшчэ больш інтэрактыву: тут была магчымасць паспрабаваць свае сілы ў лепцы з салёнага цеста, ствараючы ўсімі любімыя тарты і пірожныя, і сабраць канструктар альбо савецкую мясарубку. Асобная ўвага — экспанатам, звязаным з мясцовымі прадпрыемствамі. Напрыклад, на стэндзе парфумерна-касметычнай фабрыкі “Сонца” трэба было падабраць сродак для прання, які адпавядае тыпу тканіны, а на паліцы з прадукцыяй ААТ “Бабушкина крынка” — знайсці глазураваны сырок па апісанні. Незвычайным і займальным стаў стэнд кансервавага завода, дзе кож­ны жадаючы мог паспрабаваць закатаць слоікі.

Працягнуўся квэст у ціры музея, дзе патрабавалася скласці ліст-трохкутнік, пазнаць герояў Вялікай Айчыннай вайны і стваральнікаў зброі, а затым трапна стрэліць з аўтамата. Гэты этап аказаўся асабліва папулярным як у дзяцей, так і дарослых, бо не кожны дзень выпадае шанц патрымаць у руках сапраўдную зброю.

Кожны, хто паспяхова справіўся з прапанаванымі заданнямі, атрымліваў салодкі падарунак і магчымасць удзельнічаць у бяспройгрышнай латарэі, што дадавала азарту і весялосці ў атмасферу мерапрыемства.

Па водгуках наведвальнікаў, “Ноч музеяў” стала не проста мерапрыемствам, а сапраўдным святам для ўсёй сям’і. Удзельнікі даведаліся шмат новага пра свой край, з карысцю правялі час. Такі фармат узаемадзеяння з культурнай спадчынай, несумненна, робіць музей бліжэй да людзей, прыцягваючы ўвагу да яго экспазіцый, і дорыць магчымасць кожнаму стаць часткай займальнага падарожжа па таямніцах малой радзімы.

Агата Зіміна