У мінулую суботу
глядзельная зала раённага Цэнтра культуры сабрала не адну сотню чалавек, якія
прыйшлі, каб разам з цяперашнімі і былымі навучэнцамі харэаграфічнага
аддзялення дзіцячай школы мастацтваў № 1 адсвяткаваць 20-годдзе з дня яго заснавання.
Кож-ны з прысутных у гэты
сцюдзёны вечар атрымаў сапраўдны зарад станоўчай энергіі ад дзейства, што
разгарнулася на сцэне, галоўнымі на якой, безумоўна, былі юныя танцоры —
выхаванцы цяперашніх педагогаў-харэографаў.

За гады існавання аддзяленнем выпушчана
каля 250 чалавек, якія вучылі-ся мастацтву танца. Многія з іх працягнулі
адукацыю ў сярэдніх спецыяльных і вышэйшых навучальных установах, дзе набывалі
дыпломы як спецыялісты-харэографы. Некаторыя ўліліся ў вядомыя дзяржаўныя
танцавальныя ансамблі як Беларусі, так і Расіі. Сярод іх — Сяргей Саханчук і
Дар’я Цівінская. Дарэчы, апошняя некалькі гадоў працавала педагогам у ДШМ № 1,
і танцы ў яе пастаноўцы і цяпер жывуць на сцэне, у чым можна было ўпэўніцца
падчас святочнага справаздачнага канцэрта.

Але найбольш цёплых слоў у свой адрас
атрымала загадчык харэаграфічнага аддзялення Марыя Яраславаўна Шабуневіч. Яна
не толькі стаяла каля вытокаў танцавальнага накірунку дзейнасці першай
“музыкалкі”, але і сёння з’яўляецца яго ідэйнай натхняльніцай.

З нагоды круглай даты ў госці да педагогаў
і вучняў прыйшлі старшыня райсавета дэпутатаў Аляксандр Пузік і загадчык
аддзела культуры райвыканкама Iрына Раманчук, якія цёпла павіншавалі віноўнікаў
ура-чыстасці са святам. З рук Аляксандра Віктаравіча педагог Шабуневіч за
добрасумленную працу атрымала грамату райсавета, а Iрына Аляксандраўна паднесла
сапраўдны сюрпрыз — падарыла два камплекты новенькіх танцавальных касцюмаў.

Было ў гэты вечар і шмат кветак — у знак
удзячнасці за талент і прафесіяналізм, за цеплыню сэрцаў і магутную энергетыку.
Яе пастаянна дораць гледачам танцоры з ДШМ № 1 і з надзеяй на тое, што яшчэ не
адно дзесяцігоддзе аддзяленне бу-дзе развіваць харэаграфічнае мастацтва сярод
юных асіпаўчан.