Днямі працаўнікі завода аўтаагрэгатаў сталі
сведкамі цікавага мерапрыемства пад назвай «Міс АЗАА-2011”, якое было ініцыявана
сакратаром «пярвічкі” БРСМ Аленай Бродскай. Менавіта яна сабрала каманду
аднадумцаў, якія ўпэўнены: іх дзяўчаты-завадчанкі заслугоўваюць таго, каб з
гонарам насіць папулярны апошнім часам тытул «Міс”. Тым больш, што вопыт
правядзення падобнага дзейства ў асіпаўчан ужо ёсць — многім вядомы прозвішчы
пераможцаў конкурсу «Міс Асіповічы-2009 і 2010” Юліі Нямцовай і Валерыі Чыгілейчык.

Кіраўніцтва прадпрыемства прапанову моладзі не
толькі падтрымала, але і выдаткавала грашовыя сродкі на яго правядзенне.

Жадаючыя прыняць удзел у конкурсе знайшліся
адразу, і на сцэну падняліся 4 удзельніцы, якія і змагаліся за званне «Міс
АЗАА”. Гэта слесары прэсава-зварачнага і цэха пластмас Алена Дзыгун і Ірына
Патапейка, насцільшчык матэрыялаў механазборачнага цэха Юлія Нікалайчык і
інжынер-тэхнолаг прадпрыемства Таццяна Шадзеўская. Якіх вядучыя Вольга
Паркалава і Дзмітрый Ступак і ўсе прысутныя ў зале сустрэлі гучнымі
апладысментамі і шчырымі ўсмешкамі.

Першым іспытам для дзяўчат стала
самапрэзентацыя. Яны ў розных формах стараліся данесці да гледачоў сваю
незвычайнасць і непаўторнасць. Затым прыгажуні хваліліся кулінарнымі
магчымасцямі, прычым, ні адна з іх не паўтарылася ў прыгатаванні конкурснай
стравы. Пасля кожная вынесла на суд журы свае творчыя здольнасці. Бліснулі
дзяўчаты і эрудыцыяй. А апошнім конкурсным заданнем стала дэфіле, падчас якога
можна было палюбавацца знешняй прыгажосцю дзяўчат, іх грацыяй і элегантнасцю.

Паўзы паміж іспытамі канкурсантак запаўнялі
выхаванцы гуртка эстрадных спеваў падлеткавага клуба «Факел” (кіраўнік Таццяна
Салімон) Хрысціна Рошчына, Кіра Гапановіч, Лізавета Балоцька, Вікторыя
Антоненка і Дар’я Моцевіч. Дарэчы, цудоўным фонам для песень у выкананні Дашы
стала падтанцоўка, з якой выдатна справіліся яе сяброўкі — выхаванцы дзіцячага
садка № 10 (кіраўнік Алена Слука).

І вось — самы хвалюючы момант: чаканне прозвішча
пераможцы. Вердыкт журы наступны: Алена Дзыгун удастоена тытула «Міс Грацыя”,
Ірына Патапейка — «Міс Абаяльнасць”, Юлія Нікалайчык — «Міс Элегантнасць”. А
вікторыю святкавала Таццяна Шадзеўская, на галаву якой намеснік дырэктара па
ідэалагічнай рабоце Андрэй Чыгілейчык і ўсклаў карону.

Начальнік аддзела культуры райвыканкама Ірына
Раманчук пры падвядзенні вынікаў адзначыла, што свята адбылося дзякуючы
смеласці і мужнасці ўдзельніц. І няхай не ўсе сталі ўладальніцамі галоўнага
прыза, затое найперш змаглі перамагчы саміх сябе.

 Па словах
старшыні прафкама завода аўтаагрэгатаў Аляксандра Балашова, першы блін камяком
не стаў, усё атрымалася на славу. А гэта азначае, што наперадзе шырокае поле дзейнасці
для тых, хто хоча самаўдасканальвацца, адкрываць для сябе нешта нязведанае.

Ніна ВІКТОРЧЫК.