З яркай падзеі пачаўся 2012 год для групы
“Крышталь” з МПЦ “Равеснік”: юныя артысткі з 3 па 6 студзеня разам са сваім
кіраўніком Аксанай Мысюцінай сталі гасцямі ўкраінскага горада Прылукі
Чарнігаўскай вобласці, дзе ўдзельнічалі ў ХI Міжнародным маладзёжным фестывалі
“Мистецькі барви” — “Мастацкія фарбы”, як гэтае музычнае мерапрыемства
называецца па-беларуску.

Сярод мноства ўдзельнікаў — а сюды прыехалі
выканаўцы песень з Украіны, Расіі, Беларусі, Кітайскай народнай рэспублікі —
наша група стала лепшай у намінацыі “Эстрадныя ансамблі”, за што і была
ўзнагароджана Дыпломам I ступені.

Не дзіўна, што ў дзяўчынак засталіся самыя
лепшыя ўражанні і ад утульнага, якраз святочнага, гарадка, і ад паспяховага
выступлення, і ад мноства новых знаёмстваў. На гала-канцэрце гучала ў выкананні
юных асіповіцкіх спявачак песня “Сябар”, аранжыроўку для якой зрабіў Андрэй
Язвінскі. Саліст беларускага дзяржаўнага ансамбля “Песняры” Алег Жалезнякоў,
які быў адным з членаў журы, асабіста падзякаваў сваім зямлячкам за цудоўныя
песні.