Напрыканцы жніўня ў Глуску прайшоў чарговы
абласны фестываль сямейнай творчасці “Сузор’е талентаў”, які сабраў не адзін
творчы калектыў Прыдняпроўя, аб’яднаны любоўю да роднага краю, да яго
самабытнай культуры, да тых звычаяў і традыцый, якія спакон веку захоўваюцца ў
беларускіх сем’ях. Адметнасць сёлетняга фестывалю — удзел у ім і самадзейных
артыстаў з Расіі і Украіны.

Два жнівеньскія дні Глушчына сачыла за яркай,
арыгінальнай творчасцю сямейных дынастый.

Наш раён на гэтым свяце прадстаўляў сямейны
ансамбль “Свята” з Пратасевіцкага сельскага Дома культуры. У яго складзе — муж
і жонка Аляксандр і Наталля Еўдакімовічы, а таксама іх трое дзяцей: сыны, Ілья
і Уладзіслаў, і дачушка Марыя. Яны ўжо не першы раз бяруць удзел у гэтым
фестывалі. І, як правіла, вяртаюцца з яго з узнагародамі. Так, сёлетнія
спаборніцтвы прынеслі ім удачу ў конкурсе рыбаловаў, падчас якога трэба было
налавіць рыбы і прыгатаваць з яе юшку. Як прызнаюцца Еўдакімовічы, гэтая
нацыянальная беларуская страва аказалася такой смачнай і наварыстай, што журы
аднагалосна прызнала іх пераможцамі і ўручыла Дыплом І ступені. Акрамя гэтага
конкурсу, было шмат іншых. Але найбольшую цікавасць, на думку Наталлі
Анатольеўны, выклікаў такі, як “Сувязі часу праз ручнік”, у ходзе якога трэба
было прадставіць ручнік — сімвал сямейнага дабрабыту і шчасця. Дружная сям’я
Еўдакімовічаў дэманстравала ручнік, сатканы па ўзору вырабу канца ХІХ
стагоддзя, які належаў жыхарцы Дараганава.

Наогул жа, фестываль прынёс яго ўдзельнікам
багата ўражанняў, новых знаёмстваў і стасункаў, даў магчымасць абагаціцца
новымі творчымі ідэямі. І, галоўнае — засяродзіў увагу на такіх паняццях, як
дабрыня, любоў, павага і ўзаемаразуменне, на якіх трымаецца са-праўдная сям’я.