Больш за чатыры з паловай сотні мерапрыемстваў арганізаваў у мінулым годзе раённы Цэнтр культуры: выставы, канцэрты, дыскатэкі, конкурсы, вечарыны… Людзі самага рознага ўзросту знайшлі для сябе нешта цікавае ў сценах гэтай культурнай установы. Ёсць і вынікі ў выглядзе шматлікіх дыпломаў, якія атрымалі калектывы РЦК: народны ансамбль песні і музыкі “Дзівакі” стаў трэцім на міжнародным фестывалі “Звіняць цымбалы і гармонік”, ансамбль танца “Асарці” выдатна выступіў на конкурсах “МегаДанс”, “Залатая Ліра” і “Гомельскі карагод”, народны фотаклуб “Раніца” прывёз з абласнога этапу рэспубліканскага конкурсу “Гэта твая зямля” дыпломы II і III ступеняў.

Карацей, не дзіўна, што менавіта РЦК па выніках года прызнаны лепшым сярод клубных устаноў раёна.

Вось 5 самых яскравых і запамінальных мерапрыемстваў, выдзеленых арганізатарамі:

1. Конкурс “Містар Асіповічы”

Упершыню ў горадзе правялі конкурс на выяўленне не толькі “самай-самай”, але і “самага-самага”. Па колькасці гледачоў у зале было зразумела, што не прагадалі. Напэўна, найбольш запамінальным конкурсам стала дэфіле хлопцаў у дзелавых і спартыўных касцюмах — аказваецца, не долькі дзяўчыны могуць прыгожа і відовішчна хадзіць па сцэне. Факт наяўнасці ў нас актыўных, таленавітых і артыстычных маладых людзей быў даказаны. Цяпер “Містара Асіповіч” плануецца выбіраць кожны год — напрыканцы лютага землякоў чакае новае шоу.

2. Конкурс “Сям’я года”

Яшчэ адно ноу-хау РЦК у 2011 годзе, якое праводзілася ўпершыню і паспяхова — узгаданы раённы конкурс. Разнастайныя творчыя заданні для дзяцей і іх бацькоў дапамаглі вы-значыць не только пераможцу, але і сям’ю самую вясёлую, самую таленавітую і самую дружную. І зноў — аншлаг на мерапрыемстве.

3. Святочнае шоу да Дня горада

 Амаль два месяцы займаліся тут падрыхтоўкай да Дня горада. Падчас святочнага адкрыцця ў цэнтральным парку са сваімі нумарамі выступалі лепшыя артысты і калектывы Цэнтра, арганізацыяй і правядзеннем вячэрняга канцэрта зорак беларускай эстрады займаўся таксама РЦК.

4. Конкурсы “Міні-міс Асіповічы” і “Міс Асіповічы”

Прыгажунь юных і зусім юных выбіралі ўжо не першы раз, але летась конкурсы сталі асоба адметнымі і відовішчнымі. Арганізатарам удалося знайсці шмат спонсараў, што забяспечыла ўсіх дзяўчат каштоўнымі падарункамі .”Міс Асіповічы” на гэты раз нагадвала “Міс Беларусь” — на так званых “выязных” конкурсах, якія праходзілі загадзя, дзяўчат знімаў аператар, і пасля манціраваліся і дэманстраваліся прэзентацыі аб кожнай удзельніцы.

5. Вечар, прысвечаны Дню пажылых людзей

Пець, танчыць і весяліцца любяць людзі ўсіх узростаў, і Цэнтр дае магчымасць цікава бавіць час не толькі моладзі. Так, да Дня пажылых людзей была арганізавана сапраўдная вечарына з чаяваннем і выступленнямі калектываў РЦК, якім удзельнікі падпявалі і падтанцоўвалі. Задаволенымі засталіся ўсе.