Гармонік ад самага пачатку быў духавым язычковым
інструментам. Цяперашнюю форму ён набыў толькі ў ХІХ стагоддзі, дзякуючы рускім
майстрам. Менавіта ад “мадэрнізаванага” гармоніка вядуць свой “радавод” баян і
акардэон. Гэтыя ды іншыя цікавыя факты пра любімыя інструменты даведаліся
слухачы, якія сабраліся на канцэрт “Іграй, мой баян!” у школе мастацтваў № 2 19 мая.

Вучні народнага аддзялення па класе акардэона і
баяна выконвалі беларускія, рускія і ўкраінскія народныя песні і мелодыі, а
таксама жартаўлівыя прыпеўкі пра музыку. Узровень свайго майстэрства
прадэманстравалі і сёлетнія выпускнікі, якія ў той дзень на “выдатна” здалі
дзяржаўны іспыт. Руслан Мельнік удала ўвайшоў у вобраз свайго “музычнага
героя”, сыграўшы інструментальную кампазіцыю “Зареченский хулиган” (варыяцыя
вядомай песні “Крутится, вертится шар голубой”). Валерыя Кунцэвіч падаравала
прысутным тэмпераментны “Закарпацкі танец”.

Актыўны ўдзел у канцэрце прымалі і выкладчыкі
аддзялення: Наталля Андрушкевіч, Вольга Недаводава, Святлана Бараноўская і
Таццяна Ашэйчык. І калі б у зале было паболей месца, то наўрад ці хто змог бы
застацца на сваім месцы падчас гучання такой добрай музыкі!

Узгадалі на канцэрце і рускага баяніста, які ўсё
жыццё прысвяціў музыцы і заснаваў папулярную перадачу “Іграй, гармонік!” —
Генадзя Завалокіна. Аказваецца, у школе працуе яго зямлячка, таксама баяністка
Вольга Недаводава. Яна не раз хадзіла з бацькамі ў Новасібірску на канцэрты
Завалокіна, якія пастаянна збіралі аншлагі. У свой рэпертуар Вольга Андрэеўна
ўключыла песні з творчасці знакамітага земляка і яго дачкі.

Яшчэ некалькі таямніц, звязаных з гармонікам і
яго музычнымі “сваякамі”, раскрыла Наталля Андрушкевіч:

— Нельга сказаць, што на баяне складаней
навучыцца іграць, чым на акардэоне, і наадварот. У кожнага інструмента ёсць
свае нюансы. Напрыклад, на акардэоне бачыш толькі кнопкі, а левая рука іграе
“ўсляпую”. На баяне ж усе кнопкі відаць добра, але іх вельмі многа, і трэба
шырока расстаўляць пальцы.

Дзеткі, якія прыходзяць у школу, па-простаму
кажуць: “Хачу навучыцца іграць на гармоніку!” У нас выкладаецца ігра на
акардэоне і баяне. Знаёмім малых з гэтымі інструментамі і тлумачым, чым яны
адрозніваюцца ад гармоніка. Гонар нашага аддзялення — Максім Васількоў, вучань
Святланы Бараноўскай. Ён скончыў Мінскае музвучылішча, а пасля — Ленінградскую
кансерваторыю. Зараз жыве ў Расіі і шмат гастраліруе.

Раней баян і акардэон лічыліся больш
“застольнымі” інструментамі, але апошнім часам сталі актыўна папулярызавацца на
эстрадзе. Музыкі Пётр Дранга, Васіль Глубачэнка, Валерый Коўтун, Алег Скрыпка
пішуць багата добрых твораў і апрацовак, дзе выкарыстоўваюцца баян і акардэон.

Вольга ЛЮБАНСКАЯ.