25 сакавіка ў актавай зале
дзіцячай школы мастацтваў № 2 прайшла невялікая “паўднёвая” вечарына.
Выкладчыца па класу гітары Ала Бежык разам з вучнямі пазнаёмілі слухачоў з
творамі, дзе ярка выяўлены народныя музычныя традыцыі Іспаніі.

Гэта краіна на працягу пяці
стагоддзяў знаходзілася пад уладай арабаў, у выніку чаго адбылося скрыжаванне
многіх культур. Адсюль узнік асаблівы стыль іспанскай музыкі з усходнім
каларытам — фламенка. Ён выконваецца толькі на гітары, якая называецца
“сананта” і мае шэраг адрозненняў ад класічнага інструмента.

Юныя музыкі прадставілі
розныя тэхнікі выканання фламенка: расгеада, легата, пікада, трэмала. Ягор
Прыходзька і Дзіма Пышны падарылі гасцям мелодыю “Севіліяна”. Грукат абцасікаў
і бразганне кастаньетаў знайшлі сваё адлюстраванне ў “Іспанскіх танцах” у
выкананні трыа — Арцёма Доўгага, Рамана Рыбакова і Ігара Краснашчока. А выступленню
дзяўчат-гітарыстак Мілены Лявікінай, Маргарыты Чабатаровай, Лены і Каці
Навасёлавых надалі відовішчнасці стылізаваныя іспанскія касцюмы.