На мінулых выхадных на Магілёўшчыне прайшоў ХI
Міжнародны фестываль дзіцячай творчасці “Залатая пчолка”. У Клімавічы з’ехалася
мноства ўдзельнікаў і гасцей з 14 краін і ўсёй Беларусі. Па добрай традыцыі на
гэтым свяце талентаў прысутнічалі прадстаўнікі і нашага раёна.

Увечары 26 мая на плошчы Вялікага Кастрычніка свае забаўляльныя праграмы прэзентавалі лепшыя
дыскаклубы вобласці: горацкі, мсціслаўскі і асіповіцкі — “ММ-dance”, які
дзейнічае пры цэнтралізаванай клубнай сістэме. Нашы вядучыя Вольга Салаўёва і
Кацярына Пестава адзіныя вялі праграму адразу на дзвюх мовах — рускай і
англійскай. Што было вельмі да месца, паколькі на фэсце прысутнічалі румыны і
кітайцы. Пасля заканчэння часу, адведзенага для “ММ-dance”, публіка была ў
выдатным настроі і не хацела разыходзіцца, таму дыджэй Аляксей Маслаў парадаваў
слухачоў некалькімі ўласнымі кампазіцыямі.

У суботу адбываліся конкурсныя праслухоўванні.
Наш ансамбль “Вясёлка” са школы мастацтваў № 2 атрымаў дыплом ІІІ ступені ў
намінацыі “Народныя спевы”.

У той жа дзень у гарадскім парку працавалі
выставачныя падворкі, якія прэзентавалі кожны раён Магілёўшчыны. Асіповіцкую
“візітку” падрыхтавалі работнікі раённага Цэнтра народных рамёстваў. Метадыстка
Аляксандра Рыбак разам з вучаніцай Ксеніяй Раманчук праводзілі майстар-класы па
ткацтву. Песнямі і танцамі забаўлялі клімаўчан і гасцей горада ансамблі
“Вясёлка” і “Крынічка” (школа мастацтваў № 1).

Экспертная камісія, куды ўваходзілі міністр
культуры Павел Латушка і начальнік абласнога ўпраўлення культуры Анатоль
Сінкавец, узнагародзіла землякоў спецыяльным прызам за арыгінальную фальклорную
прэзентацыю падворка.