Народны ансамбль
эстраднага танца “Капрыз” і ўзорны “Асарці” раённага Цэнтра культуры заўсёды
ўпрыгожваюць сваімі выступленнямі розныя мерапрыемствы і святы, а таму добра
знаёмы землякам. Першы існуе амаль два дзясяткі гадоў, другі — паўтара. Таму
многія асіпаўчане выкарысталі магчымасць далучыцца да чароўнага свету танца,
паспрабавалі сябе ў гэтым відзе пластычнага мастацтва. Узроставая градацыя
ўдзельнікаў калектываў значная: аматараў да 14 гадоў аб’ядноўвае “Асарці”, але
хапае і тых, каму пад 40. Дарэчы, такая тэндэнцыя намецілася якраз апошнім
часам — асвойваць танцавальныя рытмы ніколі не позна!

Адна з галоўных умоў для
залічэння пачынаючых артыстаў — шчырае жаданне і іскрынкі ў вачах. “Калі бацькі
прыводзяць хлопчыка ці дзяўчынку, стараюся пагаварыць тэт-а-тэт. Дзіця
пацвярджае, што сапраўды жадае займацца танцамі — з задавальненнем прымаем у
калектыў”, — дзеліцца сакрэтам “уступнага экзамену” мастацкі кіраўнік і
балетмайстар Дзіяна Шатанава. Якая ўпэўнена: калі ў дзіцяці шмат энергіі і яе
ўдаецца накіраваць у патрэбнае рэчышча, атрымліваюцца харызматычныя выканаўцы.

Нягледзячы на тое, што
наведванне ансамбля — рэч добраахвотная, тут ніколі не бывае, каб танцоры
ігнаравалі рэпетыцыі. Вялікіх намаганняў па навядзенні дысцыпліны прыкладаць не
даводзіцца: дзецям і так зразумела, што кожная гадзіна заняткаў дорага каштуе.
У сэнсе набыцця ведаў і ўменняў, канечне. Абавязковая ўмова — выкладацца на
сцэне на ўсе сто. Акрамя выдатнай харэаграфіі і фізічнай загартоўкі выхаванцы
атрымліваюць урокі акцёрскага майстэрства, грыму. Хіба хоць аднаму чалавеку, у
якім бы ўзросце ён ні быў, такія эксклюзіўныя веды могуць пашкодзіць?

“Капрыз” і “Асарці” —
частыя ўдзельнікі розных фестываляў і конкурсаў, у тым ліку рэспублікан-скага і
міжнароднага ўзроўняў. Напрыклад, толькі сёлета скарбонка “Асарці” папоўнілася
Дыпломам I ступені з “МEGADANCE”, другія прыступкі ўзяты на “DANCE FANTASY” і
адкрытым конкурсе па дзіцячай харэаграфічнай творчасці “Брава, дзеці!”. На
гэтых жа і іншых фестывалях паказаў клас і заваяваў лідарства і “Капрыз”.
Найвышэйшымі баламі ацэнена яго выступленне на рэспубліканскім фестывалі па
ўсходнім танцы і лаці-на-шоу “Залаты бісер”. Безумоўна, паездкі не былі б
магчымымі без дапамогі бацькоў, якія бяруць на сябе не толькі фінансаванне, але
і заўсёды падтрымліваюць маральна.

Якім чынам удаецца
пакараць сваіх і з іншых гарадоў і нават краін гледачоў? Складаемых некалькі.
Напрыклад, гэта выдатная адпрацоўка нумароў, плюс — яркія цікавыя касцюмы, якія
стварае для ансамбляў канцэртмайстар Ларыса Шатанава. Ну і, безумоўна, свядомая
рэалі-зацыя задумы пастаноўкі ўсімі яе ўдзельнікамі, бо танец — гэта перадача
пачуццяў, эмоцый, думак.

Прафесійнае майстэрства
Шатанавых дазваляе ставіць з поспехам нумары розных жанраў. Вось і народныя
танцы ў інтэрпрэтацыі іх калектываў заўсёды “гучаць” па-новаму. “Людзям
па-трэбна шоу!” — упэўнены апантаныя Шатанавы і робяць усё для таго, каб
выступленні выхаванцаў менавіта так і можна было характарызаваць. Дарэчы,
Дзіяна лічыць сябе прыхільніцай класічнага эстраднага танца, які фарміруе не
толькі пластыку, а і эстэтычны густ і культуру наогул.

Якраз у гэтыя дні “Асарці
і “Капрыз”          удзельнічаюць у
міжнародным фестывалі-конкурсе мастацтваў “Аванці” ў Мінску. Чакаем новых
уражанняў— хай ведаюць нашых!