27 мая Асіповічы прымалі VI Міжнародны літаратурна-музычны фестываль нацыянальных культур Расіі і Беларусі “Сузор’е-2023”.

Мерапрыемства сабрала ў канцэртнай зале раённага Цэнтра культуры і вольнага часу 32 фіналісты творчага спаборніцтва.

Раніца для галоўнай пляцоўкі горада пачалася з сустрэчы дэлегацыі з Расійскай Федэрацыі. Артысты народнага ансамбля народнай песні “Люлечка” праспявалі для гасцей свае лепшыя песні і паднеслі традыцыйны каравай. Далей госці маглі пазнаёміцца з шыкоўнай тэматычнай выставай “Летапіс Асіповіцкага краю”, якую арганізавала цэнтральная бібліятэчная сетка, набыць гліняныя вырабы майстроў цэнтра народных рамёстваў і кнігі ўдзельнікаў фестывалю з аўтографамі аўтараў.

Конкурсная праграма распачалася апоўдні. З прывітальным словам да прысутных і творцаў звярнуліся старшыня райсавета дэпутатаў Сяргей Сувееў і настаяцель манастыра ў гонар абраза Божай Маці “Жываносная крыніца” ў Прошчы ігумен Максім (Юндзіл). Каб усе ўдзельнікі атрымалі справядлівую адзнаку, прадстаўленыя работы разглядала журы на чале са старшынёй Мінскага гарадскога аддзялення Саюза пісьменнікаў Беларусі, членам праўлення Саюза пісьменнікаў Саюзнай дзяржавы і старшынёй Таварыства дружбы “Беларусь-Расія” Міхаілам Пазняковым.

Вызначыць у вялікім паэтычна-музычным сузор’і ярчэйшыя зоркі было для журы няпростай задачай. Прызавыя месцы размеркаваліся наступным чынам. У намінацыі “Паэзія” віцебчанка Лідзія Шычко заняла трэцяе месца, “срэбра” ў расіянкі Наталлі Адлер, на галоўную прыступку пераможнага п’едэстала паднялася мінчанка Ганна Красоўская. Паэтычны гран-пры аднадушна прысудзілі жыхарцы Пастаў Марыне Трушынай. Намінацыя “Аўтар-выканаўца літаратурнага твора” не адрознівалася вялікай колькасцю ўдзельнікаў. Аднак і тут былі вызначаны лепшыя. Узнагароды  атрымалі Людміла Стаховец, Юрый Корбан і Наталля Калеснікава. Гран-пры заслужыў Уладзімір Раманчук. Зоркі намінацыі “Выканаўцы песень” — Галіна Ліс, Ганна Ануфрый і ансамбль 51 гвардзейскай артылерыйскай брыгады. Завяршылася мерапрыемства агульным выкананнем песні “Асіповіцкі край” на словы Тамары Кавальчук.

* * *

У гэты ж дзень у Вяззеўскім сельскім Доме культуры адбыўся ХIХ раённы фестываль дзіцячых і маладзёжных выканаўцаў і калектываў «”Хваля” збірае сяброў», прымеркаваны да Міжнароднага дня абароны дзяцей.

Удзельнікі прадставілі творчыя нумары ў намінацыях “Вакал”, “Тэатральнае майстэрства” і “Харэаграфія”. Разнажанравыя нумары і насычаная канцэртная праграма нікога не пакінула раўнадушным.

* * *

28 мая раённы Цэнтр культуры і вольнага часу зноў прымаў маштабны культурны фэст — III регіянальны конкурс харэаграфічнага майстэрства

“Зоркі Сусвету”. 460 удзельнікаў ад 2,5 да 18 гадоў, сем напрамкаў і поўная глядзельная зала…

— Было адчуванне, што танцаваў увесь горад і раён, — дзеліцца ўражаннямі загадчык РЦК Таццяна Сазановіч. — Наша зала не змагла ўмясціць усіх жадаючых паглядзець на выступленні юных талентаў, і прыйшлося раздзяліць мерапрыемства на дзве часткі. Атрымалася сапраўднае сямейнае свята. Спадзяюся, што конкурс працягне сваё існаванне і будзе запальваць новыя зоркі творчага сусвету.