На будынку Вязскага лясніцтва ўстаноўлена першая на Асіповіччыне памятная дошка ў гонар заслужанага лесавода БССР

Такая пашана выказана Івану Бураку, які амаль 50 гадоў працаваў у Асіповіцкім лясгасе. Цырымонія адкрыцця адбылася падчас рэспубліканскай выязной калегіі. Ва ўрачыстасці прынялі ўдзел міністр лясной гаспадаркі краіны Аляксандр Кулік, старшыня Магілёўскай абласной арганізацыі прафсаюза работнікаў лесу і прыродакарыстання Іван Трамбачоў, генеральныя дырэктары Мінскага і Магілёўскага дзяржаўных вытворчых лесагаспадарчых аб’яднанняў, дырэктары лясгасаў і падпарадкаваных Мінлясгасу арганізацый з Мінскай і Магілёўскай абласцей.

Іван Бурак пачаў працаваць у 1957 годзе ў Ліпеньскім лясніцтве. У 1966-м ён узначаліў Вязскае лясніцтва. Праз год сюды завезлі высакародных аленяў, а ў 1997-м — зуброў. Менавіта адсюль пайшло засяленне Асіповіччыны гэтай магутнай жывёлай. Іван Сцяпанавіч не ўяўляў жыцця без сваёй справы і, знаходзячыся на заслужаным адпачынку, працягваў працаваць майстрам лесу. У 1970 годзе ён атрымаў юбілейны медаль “За доблесную працу ў азнаменаванне 100-годдзя з дня нараджэння У.І. Леніна. Іван Бурак тры гады запар, у  1976, 1977, 1978-м, станавіўся пераможцам Усесаюзнага сацыя-лістычнага спаборніцтва. Быў  удзельнікам першага і адзінага злёту лесаводаў БССР, дэлегатам першага Усесаюзнага злёту лесаводаў у Маскве. Вялікую ўвагу Іван Сцяпанавіч надаваў лесааднаўленню, а менавіта адраджэнню дуброў. У 1981-м яго ўдастоілі ганаровага звання заслужанага лесавода БССР. Дрэвы-волаты і сёння ўпрыгожваюць раён. Шмат у чым менавіта дзякуючы Івану Бураку тут праходзілі рэспубліканскія і ўсесаюзны семінары па лесааднаўленні дуброў. У 1987-м ён атрымаў медаль “Ветэран працы”, а ў 2016 годзе ўзнагароджаны памятным знакам Мінлясгаса “80 год лясной гаспадарцы Рэспублікі Беларусь”.

За больш чым 80 гадоў існавання лясной гаспадаркі краіны званняў “Заслужаны лесавод БССР” і “Заслужаны лесавод Рэспублікі Беларусь” удастоены толькі 109 чалавек.