Дата

“Нам было цікава!”

У кастрычніку 2018 года векавы юбілей адзначыла адно з найбольш буйных, вядомых, а для многіх і лёсавызначаючых грамадскіх аб’яднанняў — Усесаюзны Ленінскі камуністычны саюз моладзі. Хутка — 24 верасня 2020 года — святкуе сваё стагоддзе Ленінскі камуністычны саюз моладзі Беларусі.

…Пачалося ўсё ў 1920 годзе на Усебеларускім з’ездзе камсамола, дзе было арганізацыйна аформлена стварэнне Камуністычнага саюза моладзі Беларусі. Юнакі і дзяўчаты з усёй адданасцю падключыліся да дзейнасці аб’яднання. Яны былі актыўнымі ўдзельнікамі партызанскага руху, пасляваеннага аднаўлення народнай гаспадаркі, стварэння энергетычнага і нафтагазавага комплексаў рэспублікі. Дзясяткі тысяч маладых людзей удзельнічалі ў будаўніцтве Бярозаўскай і Лукомльскай ГРЭС, Гродзенскага вытворчага аб’яднання “Азот”, Полацкага і Мазырскага нафтаперапрацоўчых заводаў, трох Салігорскіх калійных камбінатаў, працавалі на меліярацыі зямель беларускага Палесся. Беларускія студэнцкія атрады выязджалі на будаўніцтва аб’ектаў жыллёвага і культурна-бытавога прызначэння Сібіры, Урала, Карэліі, Якуціі,   масава ўдзельнічалі ў асваенні цалінных зямель, ударна працавалі на будоўлях Ваза, КамАЗа, БАМа. Маладзёжная арганізацыя — камуністычная па мэтах, палітычная па характары, самадзейная па метадах — цалкам аб’ядноўвала юнакоў і дзяўчат БССР. І, зразумела, ЛКСМБ быў актыўным памочнікам і рэзервам Кампартыі Беларусі.

У снежні 1991 г. на XXX з’ездзе беларуская маладзёжная арганізацыя спыніла сваё існаванне. Пасля распаду СССР яе функцыі ў нашай краіне перанялі Саюз моладзі Беларусі, а пазней — Беларускі патрыятычны саюз моладзі, якія ў 2002 годзе аб’ядналіся ў дзяржаўную маладзёжную арганізацыю — БРСМ.

У гэтыя дні ў краіне прахо-дзяць святы, сустрэчы сённяшніх і тагачасных маладзёжных лідараў, прысвечаныя 100-годдзю ЛКСМБ. Напрыклад, дэлегацыя Асіповіцкага раёна — былыя камсамольцы Людміла Ждановіч і Антаніна Сцяпанава і актывісты БРСМ Анастасія Гоціна і Алена Надзеявец — 23 верасня накіруецца ў абласны цэнтр для ўдзелу ва ўрачыстым юбілейным мерапрыемстве. А ў чацвер дэлегаты ад асіповіцкай моладзі запрошаны на рэспубліканскае святкаванне   100-годдзя ЛКСМБ у Мінску. На раённым узроўні прадстаўнікі розных пакаленняў падзеляцца вопытам, ідэямі,   успамінамі, абмяркуюць розныя праблемы і пытанні моладзі ў пачатку кастрычніка ў мясцовым гісторыка-краязнаўчым музеі, які, дарэчы, узначальвае адзін з былых маладзёжных лідараў Антаніна Сцяпанава.

Вось што ўспамінае пра камсамольскія будні яшчэ адна актывістка — Тамара Патапейка, асноўная дзейнасць якой у камсамоле прыйшлася на 80-я гады мінулага стагоддзя:

— Па-першае, нам было цікава. Па-сапраўднаму цікава. Мы нават не задумваліся, ці патрэбна ўступаць у камсамол. Натуральна, патрэбна! Гэта лічылася асаблівым і важным жыццёвым этапам, можна сказаць, стылем жыцця.

Зразумела, вельмі моцнай была ідэалогія, на якую смела абапіраліся. Усё было літаральна прасякнута нейкім добрым, светлым патрыятызмам. Мабыць, ён і быў тым самым стрыжнем для большасці і стаяў у аснове ўсяго разам з працавітасцю, пераемнасцю пакаленняў.

Яшчэ адна яркая адметнасць камсамола — калектывізм. Мы ўсе былі аднолькава роўныя, без праблем дапамагалі адзін аднаму, падтрымлівалі, былі разам у радасці і ў бядзе. Будаўнічыя атрады, суботнікі, турыстычныя паходы, дэманстрацыі — аб’ядноўвала літаральна ўсё.

Райкам камсамола іграў сур’ёзную ролю ў жыцці моладзі, накіроўваў, дапамагаў вырашыць важныя пытанні. А грамадства ў цэлым было духоўна багатым. Цікава, што хоць камсамол і адмаўляў рэлігію, але ў нашых Уставах было шмат падобнага с хрысціянскімі запаветамі: любіць бліжняга, паважаць старэйшых, не падманваць… І мы верылі, мы хацелі, мы рабілі! Мы так жылі. Так, магчыма ў бытавым плане саступалі іншым краінам, але не выключаю, што гэта і давала тую самую духоўнасць. Усё рабілася на карысць чалавека. І ў гэтым — дабро, духоўнасць і альтруізм — і была сіла тагачаснага маладзёжнага аб’яднання.