Гісторыя і сучаснасць

Напрыканцы мінулага года ветэраны 345 Гвардзейскага парашутна-дэсантнага палка сабраліся ў Лапічах, каб устанавіць памятны знак там, дзе 30 снежня 1944 года была сфарміравана іх вайсковая часць. Спачатку гэта быў стралковы полк, пазней — паветрана-дэсантны. І адзін з самых баявых сярод усіх савецкіх Паветрана-дэсантных войск. Сукупны час, праведзены палком у баявых дзеяннях падчас вайны ў Афганістане, узброеных канфліктах у Грузіі і Абхазіі, — амаль 15 гадоў. Нядзіўна, што трывалае баявое братэрства аб’ядноўвае ветэранаў-парашутыстаў і праз многія гады пасля расфарміравання 345 пдп.

Тады, у Лапічах, яны выступілі з яшчэ адной прапановай: усталяваць побач з мемарыяльнай плітой мастацкую кампазіцыю, сэнсавым цэнтрам якой павінна была стаць баявая машына дэсанта.

І ў іх атрымалася! Толькі першапачатковы план быў скарэкціраваны — з улікам магчымасцей Міністэрства абароны і інтарэсаў патрыятычнага выхавання жыхароў Асіповіччыны.

2 жніўня, у 90-ю гадавіну Паветрана-дэсантных войск, каля помніка воінам-інтэрнацыяналістам на асіповіцкай Алеі Герояў быў усталяваны макет баявой машыны з сімвалічным бартавым нумарам — 345. Урачыстая цырымонія з гэтай нагоды прайшла з удзелам кіраўнікоў райсавета дэпутатаў Сяргея Сувеева, райсавета ветэранаў Міхаіла Слесарэнкі і райарганізацыі ветэранаў вайны ў Афганістане Юрыя Корбана, прадстаўніка ветэранскай арганізацыі 345 пдп Яўгенія Дабратворскага.